सरकारले निरन्तर घाटा,आन्दोलन र अब्यस्थापनबाट थलिएको नेपाल वायुसेवा निगमको कार्यकारी अध्यक्षमा युवराज अधिकारीलाई नियुक्त गरेको छ । आज बेलुका बसेको क्याबिनेट बैठकले त्यहीँबाट अवकाशप्राप्त इलामका अधिकारीलाई नियुक्त गर्ने निर्णय गरेको हो ।

Advertisement 1

लामो समयदेखि कर्मचारीहरुको आन्दोलनका कारण अस्तव्यस्त बनेको निगम नेतृत्वमा भित्रबाटै बुझेको व्यक्ति चाहिने भन्दै पर्यटनमन्त्री प्रेम आलेको ठाडो प्रस्तावमा क्याबिनेटले यस्तो निर्णय गरेको हो । अधिकारी निगमकै ११औं तहका अवकाशप्राप्त कर्मचारी हुन् । उनले दुई वर्षअघि अवकाश पाएका थिए ।

हिजो बसेको क्याविनेट बैठकले निगमको कार्यकारी अध्यक्षमा अधिकारीलाई नियुक्त गरेको हो । अध्यक्ष सुशील घिमिरेको राजीनामा स्वीकृत गरी अधिकारीलाई नियुक्त गरेको हो । अधिकारी निगममा रहँदा विभिन्न विवादमा मुछिएका थिए । अधिकारीविरुद्ध ४ वर्ष अगाडि कार्यलयमा यौनजन्य हिंसा गरेको भन्दै उजुरी परेको खुलेको छ। नेपाल वायुसेवा निगममा अर्थ निर्देशक रहेका बेला अधिकारीले आफूहरुमाथि यौनजन्य हिंसा गरेको भन्दै अर्थ विभाग र आन्तरिक लेखापरीक्षण विभागका महिला कर्मचारीहरुले राष्ट्रिय महिला आयोगमा अधिकारीविरुद्ध उजुरी दिएका थिए।

Advertisement 2

महिला आयोगमा २०७४ भदौ २७ मा उजुरी परेको थियो। त्यसको २ महिनापछि कात्तिक ६ गते निगमका तत्कालीन पदाधिकारीको रोहवरमा दुवै पक्षबिच छलफल गराएर अधिकारीले लिखित माफी मागेसँगै सो विषयमा कतै उजुरी नगर्ने सहमति भएको थियो।

अधिकारीलाई कार्यकारी अध्यक्ष नियुक्ति गरिएपछि निगमका महाप्रबन्धक डिमप्रकाश पौडेललाई अधिकारविहीन भएका छन् । निगममा कार्यकारी अध्यक्ष नियुक्त गर्नु नहुने, महाप्रबन्धक नै कार्यकारी हुनुपर्ने सुझाव सुशील घिमिरे नेतृत्वको कार्यदलले दिएको थियो । जुन कार्यदलमा हालका महाप्रबन्धक पौडेल पनि सदस्य थिए । तर सरकारले महाप्रबन्धक हुँदाहुँदै कार्यकारी अध्यक्ष नियुक्त गरी ४५ अर्ब घाटामा गएको निगममा थप ब्ययभार थपेको छ ।