काठमाडौं। विभिन्न माग राखेर ६ दिनदेखि सत्याग्रह (अनसन)मा बसेकी नर्स अभियान्ता ज्योति रानाभाटले सरकारसँग १९ बुँदे सहमति भएपछि आफ्नो अनसन अन्त्य गरेकी छन्।

Advertisement 1

स्वास्थ्य तथा खाद्य स्वच्छता मन्त्रालयको वार्ता टोली र अभियान्ता रानाभाटबीच बुधबार बिहान भएको सहमतिपछि अनसन अन्त्य भएको हो। रानाभाटले साउन १४ गतेदेखि नर्स तथा मिडवाइफहरूको सेवा, सुविधा र व्यावसायिक अधिकारसँग सम्बन्धित माग राख्दै सत्याग्रह सुरु गरेकी थिइन्।

सहमतिपत्रमा मन्त्रालयका अतिरिक्त सचिव श्रीकृष्ण श्रेष्ठ, वरिष्ठ मेडिकल सुपरिटेन्डेन्ट डा. हेमन्तचन्द्र ओझा र कानुन अधिकृत जयप्रकाश सुवेदीले सरकारका तर्फबाट हस्ताक्षर गरेका छन् भने अभियान्ता ज्योति रानाभाटले पनि हस्ताक्षर गरेकी छन्।

सहमतिअनुसार सरकारी, प्रतिष्ठान, निजी, सामुदायिक अस्पताल, मेडिकल कलेज तथा शिक्षण संस्थामा कार्यरत नर्स तथा मिडवाइफहरूको पारिश्रमिक, सेवा–सुविधा र सम्मानजनक कार्य वातावरण सम्बन्धी अध्ययन गर्न सात दिनभित्र कार्यदल गठन गरिनेछ। उक्त कार्यदलले छ महिनाभित्र प्रतिवेदनसहित आवश्यक सुझाव पेश गर्नेछ।

यस्तै, नर्स तथा मिडवाइफका लागि सुरक्षित कार्य वातावरण, व्यावसायिक विकास, नर्स–बिरामी अनुपात (Nurse–Patient Ratio) निर्धारण, स्पेसलिस्ट नर्स, एडभान्स्ड प्राक्टिस नर्स, नर्स/मिडवाइफ प्राक्टिसनर सम्बन्धी व्यवस्था, निरन्तर व्यावसायिक विकास (CPD), क्लिनिकल गभर्नेन्स, पेसेन्ट सेफ्टी, मिडवाइफ नेतृत्वमा मातृ तथा नवजात सेवा, सम्मानजनक मातृत्व सेवा (Respectful Maternity Care) लगायतका विषयमा आवश्यक नीतिगत र कानुनी व्यवस्था अघि बढाउने सहमति भएको छ।

सहमतिमा स्वास्थ्य संस्थामा कार्यरत नर्स तथा मिडवाइफको पेशागत अधिकार, सेवाको गुणस्तर र स्वास्थ्य प्रणाली सुदृढीकरणका लागि चरणबद्ध रूपमा आवश्यक सुधारका कार्यक्रम अघि बढाउने प्रतिबद्धता पनि जनाइएको छ।

सरकार र आन्दोलनरत पक्षबीच सहमति भएसँगै स्वास्थ्य क्षेत्रमा केही दिनदेखि देखिएको तनाव अन्त्य भएको छ भने नर्सिङ क्षेत्रका विभिन्न माग सम्बोधन गर्ने प्रक्रिया औपचारिक रूपमा अघि बढेको छ।