काठमाडौं। नेपाल पर्यटन बोर्डको सञ्चालक समितिमा खुला प्रतिस्पर्धामार्फत ५ जना सञ्चालक सदस्य नियुक्त भएका छन्। संस्कृति, पर्यटन तथा नागरिक उड्डयन मन्त्रालयले मंगलबार उनीहरूको नियुक्ति गरेको हो।

Advertisement 1

नवनियुक्त सदस्यहरूमा खुमबहादुर सुवेदी, सन्तोष पोखरेल, श्रीजना केसी, पेम्बा शेर्पा र डा. शोभिता श्रेष्ठ ढकाल रहेका छन्।

पर्यटन ऐन तथा प्रचलित कानुनी व्यवस्थाअनुसार गठित बोर्ड सदस्य छनोट समितिले खुला आवेदन प्रक्रियामार्फत प्राप्त निवेदनहरूको मूल्याङ्कनपछि उनीहरूलाई नियुक्तिका लागि सिफारिस गरेको थियो।

मन्त्रालयका अनुसार बोर्ड सदस्यका लागि देशभरबाट १ हजार १०० वटा आवेदन परेको थियो। आवेदकहरूको शैक्षिक योग्यता, व्यावसायिक अनुभव, पर्यटन क्षेत्रमा पु¥याएको योगदान, नेतृत्व क्षमता तथा समग्र दक्षताको मूल्याङ्कनका आधारमा अन्तिम ५ जनाको छनोट गरिएको हो।

मन्त्रालयले पर्यटन बोर्डमा सदस्य नियुक्तिको प्रक्रिया खुला, प्रतिस्पर्धात्मक र पारदर्शी बनाइएको जनाएको छ। यसबाट पर्यटन क्षेत्रको नीति निर्माण, पर्यटन गन्तव्यको प्रवद्र्धन, लगानी आकर्षण तथा सार्वजनिक–निजी साझेदारीलाई थप प्रभावकारी बनाउने अपेक्षा गरिएको छ।

नेपाल पर्यटन बोर्डले नवनियुक्त सञ्चालक सदस्यहरूको अनुभव, विज्ञता र नेतृत्वले नेपालको पर्यटन क्षेत्रको दिगो विकास, अन्तर्राष्ट्रिय बजारमा प्रवद्र्धन तथा निजी क्षेत्रसँगको सहकार्य विस्तारमा महत्वपूर्ण योगदान पुग्ने विश्वास व्यक्त गरेको छ।