काठमाडौं। जारी एनपीएलमा आइतबार बिहान भइरहेको खेलमा जनकपुर बोल्ट्सले लुम्बिनी लायन्सलाई १३७ रनको लक्ष्य दिएको छ। प्रतियोगिताको १४औं खेलमा टस जितेर लुम्बिनी लायन्सका कप्तान रोहित पौडेलले फिल्डिङ रोजेका थिए।

Advertisement 1

ब्याटिङमा राम्रो सुरुवात गरेको जनकपुर बोल्ट्सले निर्धारित ओभरमा ९ विकेट गुमाएर १३६ रन बनाएको हो। बोल्ट्सका लागि कप्तान अनलि साहले ३९ बलमा ४५ रन बनाए। त्यस्तै आसिफ शेखले १० बलमा १६ रन बनाए। ५.३ ओभरमा ४८ रनको स्कोर हुँदा शेखलाई पहिलो विकेटका रुपमा गुमाएको बोल्ट्सले दोस्रो विकेट ९५ रनमा गुमाएको थियो।

दोस्रो विकेट गुमाउँदा ११.३ ओभर सकिएको थियो। त्यसपछि निरन्तर विकेट गुमाएपछि बोल्ट्सले सुरुवाती तुलनामा कम रनको लक्ष्य दिएको हो।

Advertisement 2

लुम्बिनीका लागि अभिशेष गौतमले ४ ओभरमा २० रन दिएर ३ विकेट लिए। त्यस्तै साद बिन जाफर र कप्तान पौडेलले २–२ तथा सन्दीप जोराले १ विकेट लिए।

जारी प्रतियोगितामा जनकपुर बोल्ट्सले आफ्ना तीनै खेल जितेको छ भने लुम्बिनी लायन्सले तीनै खेल हारेको छ।

जनकपुर आफ्नो चौथो जित तथा लुम्बिनी आफ्नो पहिलो जितको दाउमा छन्। आइतबार दिउँसो अर्को खेल सुदूरपश्चिम रोयल्स र चितवन राइनोजबीच हुने तालिका छ।