प्रशासनतर्फका शाखा अधिकृत र उपसचिवको अभाव हुँदा झन्डै १ सय ३० स्थानीय तह अझै पनि निमित्त प्रमुख प्रशासकीय अधिकृतकै भरमा सञ्चालन हुन बाध्य भइरहेका छन् । कानुनी व्यवस्थाअनुसार स्थानीय तहको प्रमुख प्रशासकीय अधिकृतमा नेपाल प्रशासन सेवाका अधिकृत, उपसचिव र सहसचिव रहने प्रावधान छ ।

Advertisement 1

तर, प्रशासन सेवाका अधिकृतहरूको अभाव हुँदा कतिपय स्थानीय तह निमित्तको भरमा सञ्चालन हुन बाध्य भइरहेका हुन् । अझै केही स्थानीय तहमा त नियमविपरीत प्रशासन सेवाभन्दा बाहेकका कृषि, स्वास्थ्य, भेटनरीलगायत समूहका कर्मचारीले निमित्त प्रमुख प्रशासकीय अधिकृतको भूमिका निर्वाह गरिरहेको पाइएको छ ।

८० वटा गाउँपालिका र ५० वटा नगरपालिकामा प्रमुख प्रशासकीय अधिकृत छैनन्। संघीय मामिला तथा सामान्य प्रशासन मन्त्रालयका अधिकारीहरु यसलाई बाध्यात्मक अवस्था भन्छन् । तर, कतिपय स्थानीय तहका जनप्रतिनिधि निमित्त अधिकृतमै खुसी हुने गर्दा पनि लामो समयसम्म प्रमुख प्रशासकीय अधिकृत जान नसकेको आरोप उनीहरु लगाउँछन् ।

Advertisement 2

मुख्य रुपमा मधेश प्रदेशमा जाने कर्मचारीहरुलाई अन्य दुर्गममा गएजस्तो भत्तासहित प्रोत्साहनमुलक व्यवस्था नभएकाले आकर्षण पनि कम भएको मन्त्रालयका एक अधिकारी बताउँछन् । कतिपय जनप्रतिनिधिले आफू निकट र आफूसँग पारा मिल्ने तल्ला तहकै कर्मचारीलाई निमित्तको रुपमा राखिदिन आग्रह समेत गर्ने गरेको उनले बताए । ‘जनप्रतिनिधिको स्वार्थमा काम गर्न प्रमुख प्रशासकीय अधिकृत जान मान्दैनन्,’ ती अधिकारीले भने, ‘त्यस्ता स्थानीय तहमा जाने अधिकृतलाई अन्य कर्मचारीबाट सहयोग पनि हुँदैन ।’