केन्द्रीय अनुसन्धान व्युरोले एक जना बहालवाला प्रमुख जिल्ला अधिकारीलाई नै फरारको सूचीमा राखेको भेटिएको छ ।

Advertisement 1

केन्द्रीय अनुसन्धान व्युरो सिआइबीले ललितानिवास जग्गा प्रकरणमा प्रहरीको २८६ जनालाई प्रतिवादी बनाउन सिफारिस गरेकोमा एक जना बहालवाला प्रमुख जिल्ला अधिकारीलाई नै फरारको सूचीमा राखेको भेटिएको हो ।केन्द्रीय अनुसन्धान व्युरोले ललिता निवासको जग्गा प्रकरणमा हालसम्म २४ जना पक्राउ गरेको छ । यस्तै यो प्रकरणमा २१ जनाको मृत्यु भइसकेकाले सम्पत्तिबाट बिगो भराउन राय दिएको छ । बाँकी २४१ जना फरारको सूचीमा छन्,तिनैमध्येका एक हुन सहसचिव सुशील वैद्य ।

Advertisement 2

यस प्रकरणमा १८ अर्ब ३६ करोड रुपैयाँ बिगो मागदाबी गरिएको छ । जग्गा हिनामिना प्रकरणमा पूर्वउपप्रधान एवं भौतिक योजनामन्त्री विजयकुमार गच्छदार, पूर्व भूमि सुधारमन्त्रीद्वय डम्बरबहादुर श्रेष्ठ र चन्द्रदेव जोशी, पूर्व भौतिक योजना राज्यमन्त्री सञ्जय साह, पूर्वसचिवहरू दीपबहादुर बस्न्यात, छविराज पन्त, युवराज भुसाल, रवीन्द्रमान जोशी, दिनेशहरि अधिकारी, नारायण गोपाल मलेगो र १८ जना पूर्व सहसचिवसहित २ सय ३८ विरुद्ध १८ अर्ब ३५ करोड ९५ लाख रुपैयाँसहित कैद र जरिवाना गर्नुपर्ने राय दिइएको छ ।

किर्ते र संगठित अपराधमा संलग्न नदेखिएका थप ४८ जनालाई जग्गा जफत प्रयोजनका लागि प्रतिवादी बनाइएको छ । पूर्वसचिवद्वय भुसाल र जोशीले भूमिसुधारमा रहँदा २०६३ सालताका गुठीका नाममा सरकारी जग्गा लैजान टिप्पणी उठाएका थिए ।

भूमाफियाहरू शोभाकान्त ढकाल, रामकुमार सुवेदी, भाटभटेनी सुपरमार्केटका सञ्चालक मीनबहादुर गुरुङ, मालपोत कार्यालय डिल्लीबजारका तत्कालीन उपसचिव हुपेन्द्रमणि केसी तथा व्यापारीहरू कैलाशचन्द्र गोयल, सन्दीपकुमार शारडा, शिवरत्न शारडा र श्रवणकुमार गोयललाई ललिता निवास जग्गा हिनामिना प्रकरणका मुख्य योजनाकारका रूपमा किटान गरिएको छ ।
यस्तै यही प्रकरणमा जोडिएकामध्ये एक जना प्रमुख जिल्ला अधिकारीको प्रहरी केन्द्रीय अनुसन्धान व्युरोको फरारको सूचीमा रहेको भेटिएको छ । सिआइबीको फरारको सूचीमा छन्,सुशील वैद्य,जो अहिले दाङ जिल्लाको प्रमुख जिल्ला अधिकारीको कुर्सीमा छन् ।

सिआइबीले बुझाएको प्रतिवेदनको सूचीमा २४१ नम्बरमा वैद्यको नाम भेटिएको छ ।  कुलनन्दन वैद्यको नाती तकन वैद्यको छोरा,जिल्ला प्यूठूान विजुवार गाविस हाल प्यूठान नगरपालिका वडा नम्बर ४ बस्ने सुशील वैद्यलाई सिआइबीले फरारको सूचीमा राखेको छ ।

उनी डिल्लीबजार मालपोत कार्यालयको तत्कालीन भूमिसधुार अधिकारीको जिम्मेवारीमा थिए । वैद्य ०७० मा काठमाडौंका भूमिसुधार अधिकारी थिए । उक्त जिम्मेवारीमा छँदा पशुपति टिकिन्छा गुठीका नाममा सरकारी जग्गा दर्ता गरी नक्कली मोही खडा गरेर हिनामिनामा सघाएको आरोप उनीमाथि छ । सिआइबीले फरार सूचीमा राखेको भेटिएको छ ।

२०७९ माघ १६ मा प्रमुख जिल्ला अधिकारीको रुपमा उनी दाङ जिल्लामा पुगेका थिए । त्यस अघि वैद्य लमजुङको प्रमुख जिल्ला अधिकारी र त्रिभुवन विमानस्थलमा कार्यलय प्रमुख चलाइसकेका हुन ।

जिल्ला प्रशासन कार्यालय दाङका अनुसार,वैद्य पाँच दिनको बिदा लिएर त्यहाँबाट हिडिसकेका छन् ।विरामी बिदा लिएर त्यहाँबाट हिडेका वैद्यको पुख्र्यौली घर प्यूठान भए पनि अहिले बर्दिया बसाइ सरेका छन् ।