राजकुमार राय

Advertisement 1

अख्तियार दुरुपयोग अनुसन्धान आयोग निदाएपछि कसको के लाग्छ र ? राजधानीको त्रिपुरेश्वरमा रहेको कम्पनी रजिष्ट्रारको कार्यालयमा ठ्याक्कै यो अवस्था देखिन थालेको छ ।

जब रातोघर घुसखोरीविरुद्ध निगरानीमा उत्रिन्छ, घुसिया कर्मचारीहरु तिल्मिलाउँछन् । यस कार्यालयको दृष्टान्त पनि यसैप्रकारको छ । २०७६ फागुन २९ मा नायव सुब्बा डोरप्रसाद पन्थी घुस प्रकरणमा पक्राउ परे ।
अख्तियार स्रोतले दिएको जानकारी अनुसार त्यसअघि सहायक रजिष्ट्रड सीताराम खड्का र टंक भट्टराईविरुद्ध २० हजार घुस लिएको आरोपसहित २०७६ मंसिर १५ मा विशेष अदालतमा मुद्दा दायर गरिएको थियो ।

Advertisement 2

त्यसको डेढ वर्षअघि अर्थात २०७५ भदौ २० मा कीर्ते कागजात बनाएर ७० करोड रुपैयाँभन्दा बढी रकम ठगी गर्ने एक दर्जनलाई प्रहरीले पक्राउ गर्यो ।

अनुसन्धानको क्रममा कार्यालयका सहायक रजिष्ट्रार पदमा कार्यरत नारायणप्रसाद पोखरेल र उमेशमान जोशीसहित शाखाको करारमा कार्यरत दुई कर्मचारीको संलग्नताको पनि देखियो ।

त्यसैगरी, निरञ्जन जाटीयाको जग्गा कीर्तेमा अख्तियारले कार्यालयकै उपरजिष्ट्रारद्धय धर्मराज रोकाया र गंगाधर पौडेललाई २०७५ असोज ११ मा नियन्त्रणमा लिएको थियो ।

शंकर इलेक्ट्रीकल इन्डष्ट्रिज प्रालिका सञ्चालक जाटीयालाई कम्पनी कार्यालयमा नबोलाईकन गुप्त योजनाअन्तर्गत स्वामित्व हस्तान्तरण गरेको आरोपमा रोकाया र पौडेलमाथि लागेको थियो ।

यसैबीच कार्यालयका कम्प्युटर अपरेटर पूर्णचन्द्र आत्रेयलाई अख्तियारको टोलीले २०७५ मंसिर २८ मा सात हजार रुपैयाँ घुस लिँदालिँदै समातेको थियो ।

२०७५ माघ १ मै सहायक रजिष्ट्रार गीताकुमारी पन्थी घुससहित पक्राउ परिन् । यसरी कार्यालयका कर्मचारीहरु एकपछि अर्को गर्दै अख्तियारको स्ट्रीङ’ अपरेशनमा पर्न थालेपछि कर्मचारीहरु त्यहाँ जानसमेत मान्दैनथे । यो सबै अख्तियारको सक्रियताले भएको थियो ।

यस कार्यालयविरुद्ध यस्ता घटनाहरु थुप्रै छन् । हाल केही कर्मचारीहरुले कार्यालयलाई अतिरिक्त कमाइ खाने भाडो बनाएका छन् ।

उद्योग मन्त्रालयमा लामो समयसम्म उद्योगमन्त्रीको कुर्सी बीचबीचमा खाली हुनु र तत्कालीन उद्योगसचिव अर्जुन पोखरेलजस्ताले अतिरिक्त कमाइको माध्यम बनाउँदा यी अड्डा सुर्धिन नसकेको कर्मचारीहरुको भनाइ छ ।

अख्तियारमा लामो समय काम गरेका हालका कम्पनी कार्यालयमै सरुवा भई काम गरिरहेका कानुनका उपसचिव टोपबहादुर विष्टहरु अहिले पनि पूराना घुस्याहा कर्मचारीकै शैलीमा बदमासी गरिरहेको बताइन्छ ।

त्यहाँका कम्प्युटर अधिकृत विनोद चौधरी, नारायण विष्ट, सुनिल चौलागाईंलगायतले बदमासी गर्ने मौका पाएका छन् । यिनीहरुले मस्ती गर्ने यी अड्डाबाट सेवाग्राहीहरु सन्तुष्ट नभएको हाम्रो फिल्ड रिपोर्टिडको क्रममा भेटिएको छ ।

कम्पनी रजिष्ट्रार्डबाटै करिब एक दशकअगाडि घुससहित रंगेहात अख्तियारसम्म फेला परेका लालबाबु कबाडी न्यायाधीशहरुको संग्दीध कृपाले गर्दाखेरि मुद्दाबाट त छुटकारा पाए । सिरहाको प्रमुख जिल्ला अधिकारी हुँदा ५० लाखको घुस प्रकरणका कारण गोर्खाको सिडियो भएर जानै पाएनन्,बाटैबाट गृहमा तानिएका उनी अहिले जगेडामा छन् ।

गोल्ड मेडलिष्ट हाकिमको कार्यालय अस्तव्यस्त

सेवाग्राहीले छिटोछरितो सेवा पाएका छैनन् भने पारदर्शिताको पनि अभाव छ । नेपाल ल क्याम्पसबाट ‘एलएमएम’ अध्ययन गर्दा गोल्ड मेडलिष्टको उपाधि पाएका अब्बल व्यक्ति हुन् लमजुङबासी सहसचिव महेश बराल ।

उनलाई सुधार खोज्ने प्रशासकको रुपमा लिइन्छ । तर, एक्लैले सुधार नहुँदो रहेछ भन्ने अनुभूति जोसुकै सेवाग्राहीले बुझ्न सक्छन् । जरा गाँडेर बसेका केही बद्मास कर्मचारीहरुले गर्दाखेरि उनले चाहेर पनि सुधार गर्न नसकेको स्पष्ट हुन्छ ।

इकर्मचारी डटकम सँगको कुराकानीमा उनले भने,‘यहाँको बद्मासीलाई न्यून गर्न मैले सक्दो मेहिनेत गरिरहेको छु ।’

सेवाग्राही चनाखो नभइदिँदा समस्या निम्तिएको उनको बुझाइ छ । आफूले कार्यालय समयभित्र अनुशासित हुन सबैलाई प्रेरित गरेको उनले सुनाए । ‘कुनै पनि कर्मचारी वा बिचौलियाको पछिपछि लागेर उसको घरसम्म जान सकिँदैन् । ट्वाइलेटमा गएर गरिएको लेनदेन होस् या अन्य चियापसलमा पछिपछि लाग्न सम्भव छैन् । यी कामहरु अनैतिक हुन् । यसमा चनाखो हुनु नै सबैभन्दा उत्तम उपाय हो’, उनको प्रतिक्रिया हो यो ।

कार्यालयमा जरा गाँड्ने कर्मचारीबाट सबै हैरान छन् । नासु श्रीराम पौडेल काजमा आएको दुई वर्ष बितिसकेको छ । स्याङ्जा घर भएका पौडेल नेपाल निजामती कर्मचारी युनियनका उद्योग मन्त्रालयको विभागीय कार्यसमितिका अध्यक्ष पनि हुन् ।

उनी कम्पनी कार्यालयमा ‘डन’ जस्तै मानिन्छन् । बिहान ७ देखि १० र बेलुका ५ देखि ८ सम्म कार्यालयमा बसेर काम गर्ने उनको धन्दा हो । बाहिरबाट च्यानल गेट लगाएर कोठामा चुकुल लगाएर सेटिङ्गमा काम गर्न उनी सिपालु छन् । उनको काम कर्मचारी युनियनको आडमा अप्ठ्यारो, प्रक्रिया पूरा नगरेका फाइल स्वीकृत गराएर उद्यमी व्यवसायीसंग टिप्स लिनु हो ।

केही महिना अघिसम्म उनले प्रालि हेर्ने जिम्मेवारीबाट कम्पनीमा हात हाल्ने गर्दँथे । प्रालिको नवीकरण, पूँजीवृद्धि, सेयर लगत कोर्नेलगायतका काममा घुस नलिई फाइल अघि बढाउनुहुँदैन् भन्ने मान्यता उनको छ ।

उनीमाथि बिचौलियाको सेटिङ्गमा फाइल हेर्ने गरेको आरोप लाग्दै आएको छ । अर्को बदनाम पात्र हुन् कम्प्युटर अधिकृत विनोद चौधरी । विगत ६ वर्षदेखि कहीकतै सरुवा नभई जरा गाँडेर बसेका उनी पूराना र चतुर कर्मचारीमा गनिन्छन् ।

कानुन व्यवसायी, लेखनदास र बिचौलियासंग यिनको गहिरो सेटिङ्ग छ । यही अड्डाबाट अंकुत सम्पत्ति आर्जन गरेर मस्ती गर्नेमा आँउछन्, कम्प्युटर अधिकृत नारायण विष्ट ।

यस्तै, बदमासी गर्ने कर्मचारीहरुको फेहरिस्त लामै दिन सकिन्छ । जसको निगरानी अख्तियारले गर्न जरुरी रहेको बताउँछन्, कम्पनीसंग सम्बन्धित जानकार तथा उद्योग मन्त्रालयका उच्चपदस्थ अधिकारीहरु ।