गृह मन्त्रालय मातहतको राष्ट्रिय पञ्जिकरण विभागले राष्ट्रिय परिचयपत्र वितवरणको कामलाई तिव्रता दिएको छ ।राष्ट्रिय परिचयपत्र,पञ्जिकरण,सामाजिक सुरक्षा कार्यक्रम लगायतको कार्यक्रम चलाउँदै आएको विभागले   झण्डै एक करोड नागरिकको विवरण संकलनको काम गरिसकेको छ । जसमध्ये कार्तिक महिनामा मात्र ४ लाख ३ हजार ११८ को विवरण संकलन गरिएको हो । उक्त ४ लाखमध्ये पनि अभियानमार्फत २ लाख ५३ हजार ५३४ र इकाईमार्फत १ लाख ४९ हजार ५८४को विवरण संकलन गरिएको विभागले जनाएको छ ।

Advertisement 1

विभागका अनुसार, हालसम्म ९९ लाख ५४ हजार ६३३ को विवरण संकलनको काम भइसकेको छ । विभागले हालसम्म मुलुकभरका ४२ जिल्लाका ४४० वटा स्थानीय तहका ४हजार ४८ वटाबाट यो विवरण संकलन गरेको हो ।

अभियान सम्पन्न भएका जिल्लाहरुमा ताप्लेजुङ, पाँचथर, संखुवासभा, ओखलढुङ्गा, झापा, तेह्रथुम, उदयपुर, खोटाङ, सल्यान, गुल्मी, पाल्पा, नवलपरासी (बर्दाघाट सुस्ता पूर्व), चितवन, सिन्धुली, काभ्रेपलाञ्चोक, कन्चनपुर, अछाम, डडेलधुरा, डोटी, मनाङ, नवलपरासी (बर्दाघाट सुस्ता पश्चिम),कास्की, मकवानपुर, भोजपुर,इलाम, सुर्खेत, कैलाली, स्याङ्जा, भक्तपुर, धनकुटा, सर्लाही, सिन्धुपाल्चोक, रुकुम (पश्चिम), तनहूँ, पर्वत, सप्तरी, रुपन्देही, बैतडी, सुनसरी, ललितपुर, बर्दिया, दोलखामा अभियान सम्पन्न भइसकेको र १३ वटा जिल्लाहरु मोरङ, कपिलवस्तु, मुस्ताङ, काठमाडौं, गोरखा, बाग्लुङ, दार्चुला, दाङ, सिराहा, धनुषा, धादिङ, बाँके, रामेछापमा सञ्चालन भइरहेको जनाएको छ ।

Advertisement 2

यस्तै विभागले अनलाईन मार्फत कार्त्तिक मसान्तसम्म ४२ लाख ५ हजार ३८३ घटना दर्ताको काम सम्पन्न गरिसकेको समेत विभागले जनाएको छ । जसमध्ये २२ लाख १५ हजार ७८१ जन्म,५ लाख ५९ हजार ८७५ मृत्युतर्फ रहेको छ भने विवाहतर्फ ८ लाख ९१ हजार ६३२,सम्बन्ध विच्छेद दर्ता गराउनेको संख्या ३३ हजार ३९२ पुगेको छ भने बसाईसराई दर्ता गराउनेको संख्या ५ लाख ४ हजार ७४३ रहेको जनाइएको छ ।

जसमध्ये अनलाइनमार्फत कार्तिक महिनामा मात्र ५५ हजार ८९ जन्म,१४ हजार ७१५ मृत्यु,२२ हजार ८ सय विवाहको घटना दर्ता गरिँदा १ हजार ४ सय ६९ सम्बन्धविच्छेद र बसाई सराई दर्ता १० हजार ५ २२ रहेको पञ्जिकरण विभागले जनाएको छ । यस्तै सामाजिक सुरक्षा भत्ता प्राप्त गर्ने लाभग्राहीहरुले परिचयपत्र नवीकरण गर्ने म्याद श्रावण १ देखि कार्तिक मसान्त सम्म रहेको उक्त समयमा जम्मा ३१,०१,१९४ जना लाभग्राहीको परिचयपत्र नवीकरण भएको पनि विभागले जनाएको छ ।

विभागको अनुसार सामाजिक सुरक्षा भत्ता प्राप्त गर्ने ४८ बर्षमाथिका जेष्ठ नागरिक सबैभन्दा धेरै ४३ दशमलव ६२ प्रतिशत अर्थात १५ लाख २६ हजार ४९५ रहेको छ भने क्षेत्र तोकिएका जेष्ठ नागरिक (६० बर्षमाथि) शून्य दशमलव ४७ प्रतिशत अर्थात १६ हजार २९७ रहेको विवरण पञ्जिकरण विभागले उपलव्ध गराएको छ । यस्तै जेष्ठ नागरिक दलित (६० वर्ष उमेर पुगेका)को संख्या ४ दशमलव २५ प्रतिशत अर्थात १ लाख ४८ हजार ६१७ जना रहेको जनाइएको छ ।

यस्तै जेष्ठ नागरिक (एकल महिला) ५ दशमलव ९५ प्रतिशत अर्थात २ लाख ८ हजार २६३ र विधवाको संख्या १० दशलमव ०५ प्रतिशत अर्थात ३ लाख ५१ हजार ८ सय १४ रहेको विभागले बताएको छ । विभागका अनुसार हालसम्म सामाजिक सुरक्षा भत्ता बुझ्ने लाभग्राहीको संख्या ३४ लाख ९९ हजार १२९ पुगिसकेको विभागको आँकडामा उल्लेख छ ।