सरकारले ३ दिन संविधान दिवस मनाउने
सरकारले तीन दिन संविधान दिवश मनाउने भएको छ । आगामी असोज २,३ र ४ गते भव्यताका साथ संविधान दिवश मनाउन लागिएको हो । मूल समारोह समितिको अध्यक्ष प्रधानमन्त्री शेरबहादुर देउवाको अध्यक्षतामा भदौ २१ गते बसेको बैठकले सो निर्णय गरेको हो ।
Advertisement 1
गृहले संघीय मामिला तथा सामान्य प्रशासन मन्त्रालयलाई पत्राचार गर्दै सबै पालिकालाई बैठकबाट पारित कार्यक्रमबमोजिम स्थानीय तहहरुमा आवश्यक निर्देशन दिन भनेको छ । गृहले पठाएको पत्रमा स्थानीय पालिकामा रहेका सरकारी तथा सार्वजनिक कार्यालयहरुले राष्ट्रिय झण्डा एवम दिवस केन्द्रित ब्यानर सजाई कार्यालय र परिसर सरसफाइ गर्नुपर्ने उल्लेख छ ।
आ-आफ्ना पालिकाका आमनागरिकलाई घर, टोल र सार्वजनिक स्थलहरुमा सरसफाइ, सरकारी कार्यालय एवम मण्डला,दरबार स्क्वायरजस्ता सार्वजनिक स्थलहरुमा साँझ दीप प्रज्वलन तथा दीपावली र आमनागरिक समेतलाई घरमा दीपावली गर्न अनुरोध गर्न भनिएको छ ।
Advertisement 2
स्थानीय छापा तथा विद्युतीय सञ्चारमाध्यमहरुबाट संविधानको महत्वसम्बन्धी रचनात्मक तथा सिर्जनात्मक कार्यक्रमहरु प्रकाशन–प्रशारण गर्न व्यवस्था मिलाउने,दिवश केन्द्रित रही अन्य सान्दर्भिक तथा उपयुक्त कार्यक्रमहरु आयोजना तथा सञ्चालन गर्न गृहले भनेको छ ।
त्यस्तै,जिल्लास्थित मठमन्दिर,बुद्धविहार, मस्जिद,गुरुद्धारा, चर्चलगायत धार्मिक स्थानहरुमा पुजारी धर्मगुरुबाट नित्य धार्मिक अनुष्ठान–सङ्कल्प गर्दा राष्ट्र,राष्ट्रियता, स्वतन्त्रता र संविधानका लागि जीवन उत्सर्ग गर्ने ज्ञात–अज्ञात शहीदहरुको आत्माको चीरशान्तिको कामना एवम् उच्च सम्मान तथा श्रद्धा प्रकट गर्दै पूजापाठ तथा प्रार्थना गर्ने प्रबन्ध मिलाउन निर्देशन दिइएको छ ।
