संघीय संसदका सांसदहरुको दशैं भत्ता खारेज गरेको छ । संघीय संसद सचिवालयले सांसदहरुको दशैं भत्ता खारेज गरेसँगै राज्यकोषको झण्डै चार करोड रकम बचत हुने भएको छ । अहिले प्रतिनिधिसभामा २७१ जना र राष्ट्रिय सभामा ५९ जना गरी ३३० जना सांसद छन् । यी सांसदहरुले बैठक भत्ता र यातायात खर्चबाहेक मासिक तलब ६६ हजार ७० रुपैयाँ बुझ्दै आएका छन्।
यस अघि सांसदहरुले दशैं पर्वका अबसरमा दशैं भत्ता पाउँदै आएकोमा यस पटक दशैं भत्ता काटिएको छ । अर्थ मन्त्रालयले बजेट कटौती गरेर पठाइदिएसँगै ससद सचिवालयले असोज महिनाको तलब मात्र सांसदहरुको खातामा हालिदिएको हो । तलवबापत मात्र सांसदहरुको खातामा २ करोड ९८ लाख ४६ हजार रुपैयाँ पठाइएको सांसद सचिवालयले जनाएको छ । सचिवालयका अनुसार सांसदका पीएका लागि १ करोड ४३ लाख ७४ हजार रुपैयाँ निकासा भएको छ ।
अघिल्लो बर्ष दशैं भत्ता दिँदा चौतर्फी विरोध र आलोचना भएको थियो । गत बर्ष दशैं भत्ता दिँदा विवाद भएको र यसबर्ष मन्त्रिपरिषदले सांसदहरुलाई दशैं भत्ता दिने वा नदिने भनी कुनै निर्णय नगरेकाले दशैंभत्ता नदिएको सांसद सचिवालयले जनाएको छ । अर्थ मन्त्रालय र संसद सचिवालयले यो वर्ष सांसदहरुको भत्ता रोक लगाएको कारण यसबाट राज्यकोषको झण्डै ४ करोड ५० लाख बचत हुन पुगेको छ ।