लमजुङमा नेपाली सेना कृषि विज्ञान संस्थान स्थापना
-अञ्जनकुमार हिमाली
निर्धारित समय भन्दा आधा घण्टा ढिलो आइपुगें । ढिलो भएकोमा सरी भन्न हिच्किचाएनन् । साढे तीनको निर्धारित समय भएपनि चारबजे मात्र NA-058 कलसाइन भएको विशिष्ठ श्रेणीको सैनिक हेलिकोप्टरमा अवतरण हुनु ९ मिनेट पूर्व अर्को हेलीमा कामु सेनापति प्रभुराम शर्मा सहित शिक्षा, विज्ञान तथा प्रविधि मन्त्रालयका सचिव रामप्रसाद थपलिया सहित दुईतारे जर्नेलहरु आइपुगेका थिए । प्रधासेनापति अवतरण गर्न साथ झण्डावाला सैनिक पजेरो गाडी हेलीप्याडसम्म पुग्न नपाउँदै प्रधानसेनापति पूर्णचन्द्र थापा पैदलनै कार्यस्थल पुगेका थिए ।
कार्यक्रम थियो सैनिक कल्याणकारी कोषद्वारा लमजुङको बेंसीसहर नगरपालिका- २ बगालेगाउँमा स्थापित नेपाली सेना कृषि विज्ञान संस्थानको उद्घाटन । सैनिक कल्याणकारी कोषको रकम हिनामिनाको खबर आइरहेका बेला पूर्णचन्द्र थापा सेना प्रमुख भएपछि रकमको सही सदुपयोग मात्रै नभएर सैनिकहरु अवकाश पश्चात खाडीमा झाडी पन्छाउन जान नपरोस् भन्ने उद्देश्यले २०७६ असार १८ गते सिलान्यास गरिएको सो संस्थान कार्यकाल सकिदै गर्दा उद्घाटन गर्न पुगेका थापाको पत्रकारहरूलाई मोबाइलबाट फोटो नखिच्न भन्दै मोबाइल खोसुल्ला जस्तो गरेका पिएसओलाई त्यसो नगर्न इशाराले सेनापतिले संकेत गरेपछि उनीहरू पछि हटेका थिए ।
३६५ रोपनीमा करीब १६ करोड लगानीमा बुद्ध कन्ट्रक्सनको ठेकेदारीमा निर्माण गरिएको सो कृषि विज्ञान संस्थान सेनाको अगुवाइमा नभएको भए दशवर्ष भन्दा पहिले सक्न मुस्किल थियो । बिएससी एजीको लागि त्रिभुवन विश्व बिद्यालयबाट सम्बोधन प्राप्त नेपाली सेना कृषि विज्ञान संस्थानमा हाल ८० जना सैनिकहरूले पढ्दै छन् । जसमा ४० जनाले कृषि र ४० जनाले भेटेनरी सम्बन्धी अध्ययन गर्दैछन् । भेटेनरी तर्फ १८ महिने जेटिए तालिमको लागि भने सिटिभिटीले नै सेलेक्ट गर्ने, उनीहरूले नै परीक्षा लिने र उनीहरूले नै सर्टिफिकेट दिने सो संस्थानका प्रशासकीय अधिकृत क्याप्टेन राजेन्द्र अर्यालले बताए । उनका अनुसार एकजना विद्यार्थीको खर्च सबै गरेर चारलाख हाराहारीमा खर्च हुने र त्यो सबै कल्याणकारी कोषले व्यहोर्ने बताए ।
श्रीजंग गणका गणपति जयराम थापाको दैनिक मनिटरी र राजेन्द्र अर्यालको चर्को खटाई नभएको भए सायद संस्थान यति छिटो सम्पन्न हुनेमा सेनापति थापाले शंका व्यक्त गरे । तसर्थ त काम निर्धारित समय अगावै सकिएकोमा क्याप्टेन अर्याल सम्मानित पनि भए ।
कार्यक्रमलाई सम्बोधन गर्नेक्रममा सेनापति थापाले संस्थानमा बिएसीमा सैनिक र गैरसैनिक दुवैका सन्तानले सर्वसुलभ रूपमा गुणस्तरीय शिक्षा प्राप्त गर्न सक्ने बताए । यही श्रावण २६ देखि बिदामा बस्ने थापाले आफ्नो पुर्खौली थलो फर्केर कृषिमा लाग्ने बताउँदै नेपाल कृषि प्रधान देश भएर पनि कृषिमा आत्म निर्भर हुन् नसकेको युबा शक्ति पलाएन हुँदै खाडी भासिएको गाउँबस्ती उजाडिदै ‘गएको बेला यस संस्थानले केही दक्ष जनशक्ति उत्पादन गरी मुलुकमै रोजगारी सिर्जना गर्न केही हदसम्म भएपनि मद्दत पुग्ने बताए ।
३ सय ६५ रोपनी क्षेत्रफलमा निर्माण गरिएको कृषि विज्ञान संस्थानमा प्रशासन तथा शैक्षिक क्षेत्रमा भवनलगायतको पूर्वाधार, छात्रावास, प्रयोगशाला निर्माण गरिएको छ । यस्तै, कृषि क्षेत्रमा फलफूल तरकारी, फार्म , फलफूलको बगैँचा, चिया बगान स्थापना गरिएको छ । संस्थानमा कुखुरा फार्म, गाई फार्म, बाख्रा फार्म, बंगुर फार्म, माछापोखरी स्थापना गरिएको छ ।
सेनापति पूर्णचन्द्र थापा र बलाधिकृत प्रभुराम शर्माले संयुक्त रूपमा उद्घाटन गर्नु भएको सो कार्यक्रममा शिक्षा सचिव रामप्रसाद थपलियाले संस्थानले जीवन निर्वाह कृषि प्रणालीलाई मात्र नभई व्यावसायिक कृषिमा जोड दिनुपर्ने बताउँदै सेनाको यो कार्यप्रति अनुग्रहित भएको बताए । निकै हतार र २६ गते मंगलबारबाटै बिदामा बस्न लागेका अनि मौसमको भर नभएका कारण फर्कन हतारिएका सेनापतिले प्रजिअ होमप्रसाद लुइँटेल र बेसीसहर नगरपालिका का मेयर गुमानसिंह अर्याललाई समय दिन नसकेकोमा दुःख व्यक्त गर्दै फर्केका थिए ।
प्रकाशित :२०७८ भाद्र ३, बिहीबार १५:१०
यो खबर पढेर तपाईलाई कस्तो महसुस भयो ?
0%
like
0%
love
0%
haha
0%
wow
0%
sad
0%
