संरक्षणको पर्खाइमा ललितपुरको न्हुँ पोखरी
ललितपुर। ललितपुर महानगरपालिका–५ लगनखेलस्थित न्हुँ पोखरीको उचित संरक्षण हुन सकेको छैन। महानगरपालिकाले ऐतिहासिक सम्पदाको पुनःनिर्माण तथा संरक्षणको पहल गरे पनि यहाँका कतिपय सम्पदा अझै व्यवस्थित हुन सकेका छैनन्।
Advertisement 1
विसं २०७४ को स्थानीय तह निर्वाचनपछि ललितपुर महानगरपालिका–५ का जनप्रतिनिधिको पहलमा न्हुँ पोखरी सरसफाइ गरिएको थियो। २०७६ सालमा सो पोखरी संरक्षणका लागि गुरुयोजना तयार गरेर काम सुरु गरिए पनि बजेट अभावका कारण हालसम्म सम्पन्न हुन सकेको छैन।
ललितपुर महानगरपालिका–५ का वडा अध्यक्ष विकासमान श्रेष्ठले न्हुँ पोखरी संरक्षणको काम थालिएको बताए। ‘ऐतिहासिक पोखरी संरक्षणका लागि वडाका तर्फबाट पहल भइरहेको छ। संरक्षणका कामलाई तीव्रता दिनुपर्ने हो, तर प्राविधिक कारणले ढिलाइ भएको छ।’
Advertisement 2
मल्लकालीन समयको न्हुँ पोखरी संरक्षण भएमा लगनखेलको सुन्दरता अझ बढ्ने लगनखेलका स्थानीय राजभाई देउला बताउँछन्। ‘हामी बाल्यकालमा न्हुँ पोखरी छेउमा खेल्ने गथ्र्यौँ। धेरै वर्षसम्म पोखरी सुख्खा थियो। स्थानीयको पहलमा अहिले पानी भरिए पनि संरक्षण हुन सकेको छैन। महानगरले छिटो पोखरी संरक्षण गर्नेतर्फ ध्यान दिनुपर्छ।’ हाल सो पोखरीमा फोहर पानी छ। परिसरमा घाँस उम्रेको छ। पोखरीलाई तारबार गरेर राखिएको छ।
