संसद्, संक्रमणकालीन न्याय र संवैधानिक परिषद्को बैठक बस्नुअघि प्रचण्ड, ओली र सभापति देउवाबीच भेटवार्ता
काठमाडौं । प्रधानमन्त्री पुष्पकमल दाहाल प्रचण्ड, प्रमुख प्रतिपक्षी दल नेपाली कांग्रेसका सभापति शेरबहादुर देउवा र सत्तारुढ नेकपा (एमाले)का अध्यक्ष केपी शर्मा ओलीबीच भेटवार्ता भएको छ । प्रधानमन्त्रीको सरकारी निवास बालुवाटारमा शनिबार साँझ भएको भेटमा संसद्, संक्रमणकालीन न्याय र संवैधानिक परिषद्को बैठकका विषयमा छलफल भएको प्रधानमन्त्री प्रचण्डको सचिवालयले जनाएको हो ।
Advertisement 1
कांग्रेसले उपप्रधान एवम गृहमन्त्री रवि लामिछानेको सहकारी ठगीमा संलग्नतालाई लिएर संसद् अवरुद्ध गर्दै आएको छ । उसले संसदीय छानबिन समिति बनाउन माग गर्दै आएको छ । प्रतिनिधिसभा बैठक आइतबार बिहान ११ बजेका लागि बोलाइएको छ ।
संवैधानिक परिषद् बैठक पनि आइतबार बिहानै बोलाइएको छ । संक्रमणकालीन न्यायसम्बन्धी विधेयक प्रतिनिधिसभा अन्तर्गतको कानुन, न्याय तथा मानवअधिकार समितिमा विचाराधिन छ । यी विषयमा छलफल गर्न प्रधानमन्त्री प्रचण्डले प्रमुख प्रतिपक्षी दलका नेता र एमाले अध्यक्ष ओलीलाई बोलाएका हुन् ।
Advertisement 2
काठमाडौंमा शनिबार एक कार्यक्रममा प्रचण्डले सबै राजनीतिक दललाई राष्ट्रिय मुद्दामा मिलाएर लैजाने बताएका थिए ।
