काठमाडौं उपत्यकामा होलीको सुरक्षा व्यवस्था मजबुत बनाइने, ९० ठाउँमा चेकजाँच तथा ड्रोनबाट निगरानी गरिने
काठमाडौं । काठमाडौंमा उपत्यकामा होली पर्वलाई मध्यनजर गरेर प्रहरीले सुरक्षा व्यवस्थामा कडाई गरेको छ । आइतवार पहाड र सोमवार तराईका विभिन्न जिल्लामा होली पर्व मनाइँदैछ । होलीको लागि प्रहरीले देशभरका सबै ठाउँमा सुरक्षा व्यवस्था मजबुत बनाएको बताएका बेला जिल्ला प्रहरी परिसर काठमाडौंले भने अन्य ठाउँमा तुलनामा झन कडाई गरेको जनाएको हो ।
Advertisement 1
काठमाडौैंमा प्रहरीले होलीविशेष सुरक्षा योजना बनाइ कार्यान्वयन गरेको जिल्ला प्रहरी परिसर काठमाडौंका प्रमुख, प्रहरी वरिष्ठ उपरिक्षक (एसएसपी) भूपेन्द्रबहादुर खत्रीले जानकारी दिए । होली पर्व आम नेपालीको लागि मेलमिलापको पर्व भएकाले मर्यादित रुपमा मनाउन उनले आग्रह गरे ।
काठमाडौंमा उपत्यका ट्राफिक प्रहरी कार्यालय र काठमाडौं परिसरका जनशक्तिलाई संयुक्त रुपमा परिचालन गरी ९० भन्दा बढी स्थानमा संयुक्त चेकिङको व्यवस्था गरिएको प्रहरी प्रमुख खत्रीले बताए । उनका अनुसार सम्भावित घटना हुन नदिनका लागि भीडभाड हुने ठाउँमा ड्रोनबाट पनि निगरानी गर्ने प्रबन्ध गरिएको छ ।
Advertisement 2
होलीलाई मर्यादित रुपले मनाउन सामाजिक सञ्जालबाट पनि प्रहरीले सचेत गराएको भन्दै उनले भने, ‘होली पर्व आम नेपालीको लागि एउटा रङको पर्व, मेलमिलापको पर्व हो । त्यसकारण शान्तिपूर्ण र एकअर्काप्रति सम्मान भावसहित होली पर्व मनाउन आग्रह गरेका छौँ । काठमाडौंमा हामीले विशेष सुरक्षा व्यवस्था लागू गरेका छौँ ।’
प्रहरी प्रमुख खत्रीले सभ्य, सुरक्षित र व्यवस्थित बनाइ सद्भावपूर्ण र उल्लासमय ढंगले होली पर्व मनाउन आग्रहसमेत गरे । उनले भने, ‘होलीमा मदिरा सेवन गरी सवारी चलाउने गरेको पाइन्छ । झैझगडा, चोरी, पकेटमारी र सवारी दुर्घटना हुँदा ज्यानै जान सक्ने अवस्थासमेत हुन्छ । त्यसकारण काठमाडौं उपत्यकामा ९० भन्दा बढी स्थानमा संयुक्त चेकिङ हुन्छ । जसले सम्भवित घटनालाई न्युनीकरण गर्दछ ।’
