आफ्नै सवारी साधन प्रयोग गरेर ट्रायल दिन पाइने
राष्ट्रिय सतर्कता केन्द्रले आफ्नै सवारी साधन प्रयोग गरेर ट्रायल दिन पाउने व्यवस्था लागू गर्न सात वटै प्रदेश सरकारलाई निर्देशन दिएको छ । सोहि निर्देशनको आधारमा पछिल्लो समय लुम्बिनी, कर्णाली प्रदेश, सुदूरपश्चिम, मधेस प्रदेश प्रदेशले यो व्यवस्था लागू गरेका हुन् ।
Advertisement 1
राष्ट्रिय सतर्कता केन्द्रले सातै वटै प्रदेशका मुख्यमन्त्री तथा मन्त्रिपरिषद् कार्यालयलाई पत्र लेख्दै ट्रायल दिने परीक्षार्थीलाई स्वेच्छाले आफ्नो सवारी साधन प्रयोग गर्न पाउने व्यवस्था मिलाउन निर्देशन दिएसँगै उनीहरुले यो व्यवस्था लागू गरेका हुन् ।
सवारी चालक अनुमति पत्र परीक्षा सञ्चालन कार्यविधि निर्देशिका, २०७७ लगायत कुनै पनि कानूनमा परीक्षार्थीले प्रशिक्षण केन्द्रकै सवारी साधन प्रयोग गर्नुपर्ने कुनै किसिमको बाध्यकारी व्यवस्था नभएको भन्दै केन्द्रले यस्तो निर्देशन दिएको हो । सवारी चालक अनुमति पत्रको प्रयोगात्मक परीक्षा अर्थात् ट्रायल दिँदा परीक्षार्थीले आफ्नो सवारी साधन प्रयोग गरी परीक्षा दिनबाट वञ्चित गरिएको र प्रशिक्षण केन्द्रकै सवारी साधन प्रयोग गरी परीक्षा दिन बाध्य पार्ने तथा त्यस बापत प्रशिक्षण केन्द्रले मनोमानी रूपमा शुल्क असुल्ने गरेको केन्द्रमा उजुरी परेपछि केन्द्रले सात वटै प्रदेश सरकारलाई यस्तो निर्देशन दिएको थियो ।
Advertisement 2
आम परीक्षार्थीको गुनासो सम्बोधन गर्न ट्रायल दिने परीक्षार्थीलाई स्वेच्छाले आफ्नो सवारी साधन प्रयोग गर्न दिन पाउने व्यवस्था मिलाउन र कार्यान्वयन भएको जानकारी केन्द्रलाई पठाउन केन्द्रले सचिव स्तरीय निर्णय गरेर निर्देशन दिएको केन्द्रका सचिव रामआधार साहले बताए ।
