रुविना श्रेष्ठ नागरिकता प्रकरणमा मुछिएका वीरगञ्ज महानगरपालिकाका मेयर राजेशमान सिंहसहित २ जनाविरुद्ध परेको उजुरीको सम्बन्धमा छानबिन गर्न गृह मन्त्रालयले दुई सदस्यीय टोली बनाएको छ ।

Advertisement 1

गृहले उपसचिव पुष्कर राना संयोजकत्वमा शाखा अधिकृत परशुराम पोखरेल सदस्य रहने गरी दुई सदस्यीय छानबिन समिति गठन गरेर काम अगाडि बढाएको जनाएको छ ।
मेयर सिंहले नक्कली बाबु बनेर रुबिना श्रेष्ठलाई नागरिकता र राहदानी दिलाएको प्रकरण गृहसम्म आइपुगेपछि मन्त्रालयले दुई सदस्यीय छानबिन समिति बनाएर काम थालेको हो । वीरगञ्ज महानगरपालिकाका मेयर सिंहले १३ साउन ०७५ मा जिल्ला प्रशासन कार्यालय, पर्सामा झुठा विवरण पेश गरी रुवीना श्रेष्ठलाई छोरीका रूपमा ३४–०१–७५–०४८४७ नम्बरको नागरिकता दिलाएका थिए । २४ साउन ०७९ मा उनले त्यही नागरिकताका आधारमा ११०३९६१७ नम्बरको राहदानी लिएको बताइएको छ ।

भुटो विवरणको आधारमा किर्ते गरी नागरिकता दिलाएको भन्दै गत पुस २४ गते जिल्ला प्रशासन कार्यालयमा वीरगञ्जका मेयर सिंह र रुविना श्रेष्ठविरुद्ध जाहेरी परेको थियो । जिल्ला प्रशासनबाट पार नलागेपछि ३ माघमा गृह मन्त्रालयमा उजुरी परेको थियो । यो प्रकरण पछि गृहले छानबिन गर्नका लागि दुई सदस्यीय समिति बनाएर काम थालेको हो ।

Advertisement 2

उता पर्सा जिल्ला प्रशासनले उजुरी पछि छानबिन प्रक्रिया अगाडि बढाउँदा अनुसूची फर्म नै गायब भएको बताइएको छ । यसैबिच फर्जी विवरणको आधारमा जारी नागरिकताको छानबिन गरी दोषीलाई कारबाहीको माग गर्दै सचेत नागरिक समाज वीरगञ्ज पर्साले धर्ना कार्यक्रम सुरु गरेको छ ।