जिल्ला वन कार्यालय मकवानपुरका डिभिजन वन अधिकृत दीर्घनारायण कोइरालाले जागिरे अवधिमा जोडेको एक करोड २५ लाख ९६ हजार तीन सय ५३ रुपैयाँ अवैध ठहरिएपछि उनी विरुद्ध भ्रष्टाचार मुद्दा दायर भएको छ ।  अख्तियार दुरुपयोग अनुसन्धान आयोगले कोइरालाविरुद्ध सोमबार विशेष अदालतमा भ्रष्टाचार मुद्दा दायर गरेको हो ।

Advertisement 1

अधिकृत कोइरालाले नियुक्ति लिएको सालदेखि २०७८ सालसम्मको आम्दानी र खर्च विवरण हेर्दा एक करोड २५ लाख ९६ हजार तीन सय ५३ रुपैयाँको स्रोत नखुलेको भन्दै आयोगले भ्रष्टाचार गरेको ठहर गरेको छ । नारायण कोइरालाले साबिक भ्रष्टाचार निवारण ऐन, २०१७ को दफा १५ एवं हाल कायम रहेको भ्रष्टाचार निवारण ऐन, २०५९ को दफा २०(१) बमोजिम गैरकानुनी रूपमा सम्पत्ति आर्जनसम्बन्धी कसुर गरेको पुष्टि हुन आएकोले निजलाई बिगो एक करोड पच्चीस लाख छयानब्बे हजार तीन सय त्रिपन्न रुपैयाँ पचपन्न पैसा कायम गरी साबिक भ्रष्टाचार निवारण ऐन, २०१७ को दफा १५, दफा १६ग, दफा ३ र दफा २९ एवं हाल कायम रहेको भ्रष्टाचार निवारण ऐन, २०५९ को दफा २०(२) अनुसार बिगो बमोजिम जरिवाना र कैद सजाय गर्न मागदाबी लिइएको छ ।

साथै कोइराला सार्वजनिक सेवाको पदमा रहेर भ्रष्टाचारजन्य कार्य गरेर गैरकानुनी रूपमा आर्जन गरेको सम्पत्ति श्रीमती गीता पौडेल कोइराला समेतको नाममा जग्गा खरिद गरेको देखिएको आयोगले जानकारी दिएको छ । ​ कोइरालाले सार्वजनिक सेवाको पदमा रहेर भ्रष्टाचारजन्य कार्य गरी गैर कानुनी रूपमा आर्जन गरेको सम्पत्ति श्रीमती गीता पौडेल कोइरालासमेतको नाममा जग्गा खरिद, निजको नाममा दर्ता कायम रहेको जग्गामा घर निर्माण तथा बैङ्क खातामा रकम मौज्दात लगायतमा गरिएका खर्चमध्ये स्रोत पुष्टि हुन नसकेको लागत मूल्य बराबरको भागको श्रोत नखुलेको सम्पत्ति बिगो जफत गर्न मागदावी लिएको छ ।