विशेष अदालतले गैरकानुनी सम्पत्ति आर्जन गरेको अभियोगमा अवकाशप्राप्त इञ्जिनियर काशीप्रसाद गुप्तालाई दोषी ठहर गरेको छ । विशेष अदालतका सदस्यहरु डा. खुसीप्रसाद थारु, रामबहादुर थापा र मुरारीबाबु श्रेष्ठको इजलासले गुप्तालाई ९ महिना कैद हुने फैसला गरेको हो ।

Advertisement 1

मंगलवार गुप्तालाई ९ महिना कैद र २ करोड १६ लाख १७ हजार १४ रुपैयाँ १५ पैसा बिगो असुली गर्न आदेश दिएको हो । गुप्तामाथि १६ करोड ७२ लाख रुपैयाँ गैरकानूनी आर्जन गरेको अभियोगमा विशेष अदालतमा मुद्दा दायर भएको थियो । तर अदालतले २ करोड १६ लाख १७ हजार १४ रुपैयाँ १५ पैसा गैरकानूनी आर्जन गरेको ठहर गर्दै त्यति सम्पत्ति जफत गर्न आदेश दिएको छ ।

अख्तियार दुरुपयोग अनुसन्धान आयोगले शहरी विकास तथा भवन निर्माण विभागका अवकाशप्राप्त सिनियर डिभिजनल इञ्जिनियर काशीप्रसाद गुप्ता र उनकी पत्नी मीता गुप्ताविरुद्ध २०७७ भदौ २५ मा भ्रष्टाचार मुद्दा दायर गरेको थियो ।सोही मुद्दामा अन्य प्रतिवादीहरूले भने सफाइ पाएका छन् । अख्तियार दुरुपयोग अनुसन्धान आयोगले संघीय आयोजना कार्यान्वयन इकाई, विराटनगरका तत्कालीन सिनियर डिभिजनल इन्जिनियर काशीप्रसाद गुप्तविरुद्ध पौने १७ करोड विगोसहित मुद्दा दायर गरेको थियो । आयोगले उनकी श्रीमती र आफन्तलाई पनि प्रतिवादी बनाइएको छ।

Advertisement 2

इन्जिनियर गुप्ता र उनकी श्रीमती मीता गुप्ताविरुद्ध १६ करोड ७२ लाख ५६ हजार विगो कायम गरी गैरकानुनी सम्पत्ति आर्जन (अकुत) गरेको सम्बन्धी मुद्दा दायर गरेको अख्तियार प्रवक्ताले जानकारी दिए। गुप्ताले आफन्त अन्जु कुमारी महतो, उदित नारायणप्रसाद रौनियार, चन्देश्वर महतो, धिरज कुमार गुप्ता, प्रिति कुमारी गुप्ता, डा. रचनाप्रसाद शाहा, विकासप्रसाद गुप्ता, विनय कुमार सिंह, विभा रानी, संगीता साह रौनियार र सन्तोषकुमार गुप्ताको नाममा खाता खोली १० करोड ४४ लाख ४३ हजार लुकाई छिपाई राखेको प्रमाणित भएपछि अख्तियारले मुद्दा चलाएको हो।