सरकारले राजस्व चुहावटमा संलग्न व्यावसायिक कम्पनी तथा फर्मविरुद्ध १४ करोड रुपैयाँ राजस्व छलीको मुद्दा दायर गरेको छ ।  राजस्व अनुसन्धान विभागले विभिन्न क्षेत्रमा सक्रिय रहेका ती व्यावसायिक राजस्व छलेको ठहर गर्दै उनीहरुविरुद्ध मुद्दा चलाएको हो।

Advertisement 1

अनुसन्धानमा संलग्न भएका अधिकारीहरुका अनुसार विभिन्न प्रतिष्ठानहरुले कारोबारको विवरण लुकाएको, मूल्य अभिवृद्धि करको नक्कली बिजक जारी गरेको र आयकर छली गरेको भेटिएपछि त्यस्ता कम्पनीविरुद्ध मुद्दा दायर गरिएको छ।

राजस्व अनुसन्धान विभागले भन्सारका दुई कर्मचारीसहित पाँच जनाविरुद्ध मुद्दा दायर गरेको छ । भन्सार छलीमा मिलेमतो देखिएपछि सुनसरी भन्सारका कर्मचारी सन्देश लामिछाने र दीपक कार्कीविरुद्ध उच्च अदालत पाटनमा मुद्दा दायर गरिएको हो ।

Advertisement 2

भारतीय सेनाको नक्कली पेन्सनपट्टा खडा गरेर उनीहरुले सामान तस्करी गरेको विभागले जनाएको छ । कर्मचारीसहित तस्करीमा संलग्न चक्रबहादुर कुँवर, निमकाजी श्रेष्ठ र खेमबहादुर गुरुङविरुद्ध मंगलबार मुद्दा दायर भएको हो । भारतीय सेनाबाट अवकाश पाएपछि नेपाल फर्कने क्रममा एकपटकमा ५० हजार बराबरका पुराना सामान ल्याउन पाउने सुविधाको दुरुपयोग गरी उनीहरुले पटक पटक तस्करी गरेका थिए । त्यसमा भन्सार कर्मचारीको समेत मिलेमतो रहेको विभागको दाबी छ । मुद्दा दायर गरिएकामध्ये गुरुङलाई विभागले पक्राउ गरेको थियो । उनीहरूबाट बिगो र जरिवानासहित एक करोड ७२ लाख असुल उपर गराउन माग गरिएको छ । सपना साडी सेन्टर, बुटवलका प्रोपाइटर राजेन्द्रप्रसाद ध्वजुविरुद्ध ठूलो परिमाणमा राजस्व छलेर कपडाको व्यापार सञ्चालन गरेको अभियोगमा जेल सजायको माग गदै मुद्दा दाएर गरिएको पनि विभागका महानिर्देशक नवराज ढुंगानाले जनाए । उनीबाट ६ करोड ६२ लाख बिगो तथा जरिवाना तिराउनुपर्ने मागदाबीसहित बुटवल उच्च अदालतमा मुद्दा दायर गरिएको छ ।

ध्वजुविरुद्ध वारेन्ट जारी गरिएको छ । राजस्वको बुटवल कार्यालयले फागुनमा सारी सेन्टरमा छापा मारेर अनुसन्धान सुरु गरेको थियो । ध्वजुलाई राजस्वले पटक–पटक बोलाएर बयान लिन खोजे पनि उपस्थित नभएको बुटवल कार्यालयका अनुसन्धान अधिकृले जानकारी दिए । स्रोतका अनुसार ध्वजुलाई फरारको सूचीमा राखेर खोजी भइरहेको छ । अदालतबाट अनुमति लिएर प्रहरी परिचालन गरे पनि पक्राउ गर्न नसकिएको ती अधिकृतले बताए ।

ध्वजुले सीमाबाट निरतर ठूलो परिणाममा कपडाको चोरी पैठारी गर्दै आएको विभाग स्रोतको भनाइ छ । उनले एउटै लटमा तीन करोडभन्दा बढीको राजस्व छली गरेको देखिएको छ । त्यसैले विभागले उनीबाट बिगोसमेत झन्डै ७ करोड असुल्नुपर्ने दाबी गरेको हो ।

विभागले चीनबाट रसुवा नाका भएर आयात व्यापार गर्ने सिलसिलामा राजस्व छलीको अभियोगमा करम दिन सेख र केशव चापागाईंविरुद्ध जेल सजायसहित ६८ लाख राजस्व रकम तिराउनुपर्ने मागसहित पाटन उच्च अदालतमा मुद्दा दायर भएको छ । विदेशी विनिमय अपचलन गरेको अभियोगमा सुदीप शर्मा, फुसाङबु शेर्पा र सायो दिङलाई ५ करोड ६७ लाख बिगो र जरिवनासहित जेल सजायको माग गरिएको छ ।