काठमाडौँको बल्खुमा प्रहरी र दुर्गा प्रसाईंको समूहबीच झडप भएको छ । झडपपछि प्रहरीले प्रदर्शनकारीमाथि अश्रुग्यास प्रहार गरेको छ । झडप हुँदा प्रसाई समूहका २ जना समर्थक घाइते भएका छन् । बल्खुमा चक्रपथमा प्रदर्शन गरिरहेकाहरु प्रहरी घेरा तोडेर कालीमाटीतर्फ जान खोजेपछि प्रहरीले बल प्रयोग गरेको हो ।

Advertisement 1

बल्खु चोकमा प्रदर्शन गरिरहेका प्रदर्शनकारीले सिंहदरबार घेर्न जाने भन्दै प्रहरी घेरा तोडेर अघि बढेपछि त्यहाँ तनाव बढेको हो । कार्यक्रमलाई दुर्गा प्रसाईं, केही धर्म गुरुलगायतले सम्बोधन गरिसकेपछि उनका समर्थकहरू सिंहदरबार घेर्न जाने भन्दै कुलेश्वरतर्फ लागेका थिए । प्रदर्शनकारी उग्र बनेपछि प्रहरीले अश्रुग्यास, पानीको फोहोरा र हवाई फायर गरेको छ । त्यस्तै  प्रदर्शनकारीले प्रहरीमाथि ढुंगामुढा गरेका छन् ।

झडपका क्रममा दुई जना प्रदर्शनकारी घाइते भएको बताइएको छ । घटनामा प्रहरी पनि घाइते भएका छन्। यसअघि सोही स्थानमा प्रसाईं समूह र युवा संघका कार्यकर्ताबिच झडप भएको थियो ।