सर्वाेच्च अदालले राष्ट्रपतिबाट आममाफी पाएका योगराज ढकाल रिगललाई आममाफी दिने निर्णय बदर गर्ने आदेश दिएको छ ।सर्वोच्चका न्यायाधीशहरु ईश्वरप्रसाद खतिवडा,सपना प्रधान मल्ल र कुमार चुडालको पूर्ण इजलासले रिगल भनिने योगराज ढकाललाई जन्मकैद छुट दिने निर्णय बदर गरेको हो।

Advertisement 1

सर्वोच्चले योगराज ढकालको कैद मिनाहा गर्ने निर्णय बदर गर्दै भारती शेर्पाको पक्षमा फैसला सुनाएको हो । सर्वोच्चले सरकारको सिफारिसमा राष्ट्रपतिले दिएको उक्त कैद मिनाह बदर गरिदिएको छ।  ११ वर्ष ११ महिना ५ दिन कैद असुलउपर गर्नका लागि रिगललाई तत्काल पक्राउ गर्न सर्वाेच्चले परमादेश दिएको छ ।यससँगै अब उनी फेरि बाँकी कैद भुक्तानका लागि थुनामा बस्नुपर्ने देखिन्छ।

रिगलले २०७२ असार २८ गते नेपालगञ्जका चेतनलाई खुँडा प्रहार गरी हत्या गरेको ठहर गर्दै तीनै तहका अदालतले सर्वस्वसहित जन्मकैदको सजाय सुनाएको थियो ।गत असोज १ गते राष्ट्रपति रामचन्द्र पौडेलले नेपालगञ्जका चेतन मानन्धरको हत्यारा रिगललाई सरकारको सिफारिसमा आममाफी दिएका थिए । उक्त निर्णयलाई उल्टाउँदै सर्वाेच्चले रिगललाई पक्राउ गर्न परमादेश जारी गरेको हो ।