एक समय थियो अहिलेका सहसचिव रुद्रमान सिंह तमाङ देखि ग्यालेक्सी स्कूलको साहुनी गीता रानाको हातमा समेत प्रेस पास थियो । रुद्रमान सिंह सहसचिव भए पछि शुद्धीकरणमा परे,प्रेस पास रिन्यु भएन ।

Advertisement 1

पत्रकार महासंघमा यस्ता गैह्र पत्रकारहरुको अझैं पनि बिगबिगी छ । नेपाल पत्रकार महासंघले जननिर्वाचित प्रतिनिधि, सुरक्षा निकायका पदाधिकारी, कर्मचारी, दलका केन्द्र, प्रदेश र जिल्ला तहका पदाधिकारीको सदस्यता नविकरण नगर्ने भनिरहेको छ । कर्मचारी,शिक्षक,दलका पदाधिकारीहरुलाई स्वघोषणा गरेर राजीनामा दिन भने पनि न त छोड्नेले जानेर महासंघको सदस्यता त्यागे न त नेतृत्व लिनेले उनीहरुलाई शुद्धीकरण नै गर्यो ।

यस्तै भद्रगोल र गैरपत्रकारहरुको कब्जामा परेको छ,नेपाल पत्रकार महासंघ रसुवा शाखा । जहाँ कर्मचारी,शिक्षकदेखि दलका नेता,स्थानीय तहको निर्वाचनमा उठेर पराजय भोगेका उमेद्धारसम्मले महासंघ कब्जा गरिरहेको देख्न पाइन्छ ।
०६७ साल अघिसम्म रसुवा महासंघ थिएन,सक्रिय पत्रकार नहुँदा नुवाकोट रसुवा पत्रकार महासंघ अस्तित्वमा थियो । ०६७ साल असारमा तदर्थ समिति बन्यो । संयोजक रहे,जिल्लाकै पूराना पत्रकार ज्ञानेन्द्रनाथ न्यौपाने (जी लेकाली),कृष्ण थापा,भगीरथ देवकोटा,सुशील कोइराला,बलराम घिमिरे र प्रेमप्रसाद पौडेल सदस्य थिए ।
त्यस यता रसुवा पत्रकार महासंघको चार कार्यकाल व्यतित गरिसकेको छ । ४४ सदस्य पुर्याइएको रसुवा शाखाले शुद्धीकरण गरेर १२ जनाको नाम हटाएर ३२ मा झारेको छ । सुधारको यो प्रयत्नलाई राम्रै मान्न सकिएला यद्यपि अझैं पनि १८ देखि २० जना गैर पत्रकार नै महासंघमा परेका छन् । नेपाल पत्रकार महासंघ रसुवा शाखाले बाग्मती प्रदेश समितिलाई ३२ जना पत्रकारको नाम पठाएको छ ।
जसमा कर्मचारी,शिक्षक,दलका नेतादेखि स्थानीय तहमा उमेद्धार बनेर पराजित भएकाहरुसम्म अटाएका छन् ।

Advertisement 2

महासंघको १३ नम्बरको सूचीमा छ,लीलानाथ नेपालको नाम । नेपाल पेशाले स्थानीय तहका कर्मचारी हुन । उनी रसुवा जिल्लाको कालिका गाउँपालिकामा शाखा अधिकृतको रुपमा कार्यरत छन् । उनी शुद्धीकरण अभियानको तिव्र विरोधी समेत हुन । यस्तै महासंघमा रहेकामध्ये कृष्णप्रसाद न्यौपाने करारका कर्मचारी हुन । प्रभाकर अधिकारी र नारायण प्रसाद देवकोटा शिक्षण पेशामा आवद्ध छन् । उद्धव रिजाल माओवादी छाडेर एमालेमा प्रवेश गरी एमालेका नेता छन् ।

महासंघको निर्वाचनलाई स्वच्छ, व्यावसायिक र मर्यादित बनाएर महासंघको प्रतिष्ठाका लागि शुद्धीकरणमा जोड दिइएको बताइए पनि नक्कली र पेशामा नरहेका कथित पत्रकारका कारण पत्रकारितालाई नै मुल व्यवसाय बनाएर जिविकोपार्जन गर्ने श्रमजिवीको अपमान र बदनाम हुँदै आएको छ ।