अख्तियार दुरुपयोग अनुसन्धान आयोगले जलस्रोत तथा सिँचाइ विभागका तत्कालीन महानिर्देशन  मधुकरप्रसाद राजभण्डारीविरुद्ध भ्रष्टाचारको मुद्दा दायर गरेको छ ।

Advertisement 1

उनको ३ करोड ८५ लाख ५१ हजार ७४० रुपैयाँ ४८ पैसा सम्पत्तिको स्रोत नखुलेको ठहर गर्दै अख्तियारले विशेष अदालत, काठमाडौंमा मुद्दा दायर गरेको हो ।सार्वजनिक सेवामा प्रवेश गरेको मिति २०५१ फागुन ३० देखि २०७९ भदौ ३१ सम्म उनले जम्मा तीन करोड पचासी लाख एकाउन्न हजार सात सय चालीस रुपैयाँ अड्चालीस पैसा वैध तरिकाले आर्जन गरेको देखिन्छ । तर उनको कुल सम्पत्ति भने सात करोड बयालीस लाख उनान्तीस हजार छयासी रुपैयाँ पैसठ्ठी पैसा देखिएपछि भ्रष्टाचार भएको ठहर अख्तियारको छ ।

राजभण्डारीले पदको दुरुपयोग गरी आर्जन गरेको रकम श्रीमती दिपा श्रेष्ठको नाममा समेत देखिएकाले हाल कायम सम्पत्तिमध्येबाट बिगो जफत गरी पाउन मागदावी लिइएको छ ।राजभण्डारीले सार्वजनिक सेवाको पदमा रहेर आफ्नो पदको दुरुपयोग गरी गैरकानूनी रूपमा आर्जन गरेको स्रोत नखुल्ने सम्पत्ति श्रीमती दिपा श्रेष्ठको नाममा खरिद गरिएको जग्गा, घर निर्माण, कम्पनी लगानी, बिमा प्रिमियम अख्तियारले उनको श्रीमती दिपा श्रेष्ठलाई पनि प्रतिवादी कायमगरी स्रोत नखुलेको सम्पत्तिबाट बढेबढाई निजको नाममा हाल कायम सम्पत्तिमध्येबाट बिगो जफत गरी पाउन मागदाबी लिई विशेष अदालतमा मुद्दा दर्ता गरेको हो ।

Advertisement 2

१० वटा बैंकमा खाता, करोडभन्दा बढी नगद

राजभण्डारीको नाममा प्रभु बैंक, नेपाल एसबीआइ बैंक, नेपाल इन्भेष्टमेन्ट बैंक, कुमारी बैंक, एनआइसी एसिया बैंक, कृषि विकास बैंक, स्ट्याण्डर्ड चाटर्ड बैंक, एनएमबी बैंक, एभरेष्ट बैंक र ग्लोबल आइएमई बैंक गरी १० वटा बैंकमा खाता देखिएको छ । ती बैंकमा उनले एक करोड रुपैयाँ जम्मा गरेको भेटिएको छ । यस अतिरिक्त राजभण्डारीको कृषितर्फ ४ लाख ८६ हजार ७ सय ८१ रुपैयाँ आय देखिन्छ । उनले घरबहालतर्फ ३६ लाख ४२ हजार ६ सय ८८ हजार, स्थानीय भत्तातर्फ ९१ हजार ८ सय ८१, दैनिक भ्रमण भत्तातर्फ एक लाख ५४ हजार ४ सय ४६ रुपैयाँ, निवृत्तिभरणतर्फ एक लाख ४९ हजार ४ सय २२ रुपैयाँ, शेयर लाभांशतर्फ ५६ हजार एक सय १५ रुपैयाँ र अन्य आय तर्फ ४ लाख रुपैयाँ देखाएका छन् ।