मन्त्रालयमा सचिव स्थिर नहुँदा कर्मचारीतन्त्रमा कतिसम्म भद्रगोल हुन्छ भन्ने कुरा सिंहदरबारले भोगिरहेको छ ।मुख्य सचिव  सरकारमा रहेकाहरुको एसम्यान बन्दा र फरक मत राख्न नसक्दा  सचिव र सहसचिवहरुमाथि चरम अन्याय भइरहेको छ । उमेर र सेवा हद पुर्याएर घर जान लागेका सचिवहरुलाई प्रधानमन्त्री तथा मन्त्रिपरिषद्को कार्यालयमा महिनौंसम्म जिम्मेवारविहिन बनाएर थन्काइएको छ ।
अझैं मन नपरेका सचिवलाई फुटबल नै बनाइएको छ । यसरी फुटबल बनाइएका सचिव हुन सुरेश आचार्य । जो सचिवमा उक्लिएका दुई बर्ष ५ महिना पूरा भयो । यो २९ महिनाको अवधिमा उनी ७ वटा मन्त्रालय चक्कर लगाइसकेका छन् । औषतमा भन्ने हो भने एउटा मन्त्रालय वा निकायमा चार महिनाभन्दा बढी समय बस्न दिइएको छैन । एउटा सचिवलाई कुनै निकाय र वा मन्त्रालयको जिम्मेवारी दिइएको चार महिनामै विना कारण लखेटिन्छ भने उस्ले कस्तो कार्यसम्पादन गर्ला ? सरुवा भएर गएको एकदेखि दुई महिना मन्त्रालय वा निकाय बुझ्नै समय लाग्छ ।

Advertisement 1

आचार्य जागिर अवधिमा लामो समय पर्यटन मन्त्रालयमा बिताएका थिए । सचिव बढुवा भएसँगै उनले नेपाल ट्रष्ट,राष्ट्रिय पुर्ननिर्माण प्राधिकरण,शिक्षा विज्ञान तथा प्रविधि मन्त्रालय (प्रविधिक) हुँदै केही समय खानेपानी मन्त्रालयमा बिताए । उनलाई त्यहाँबाट तानेर प्रधानमन्त्री तथा मन्त्रिपरिषद्को कार्यालयमा थन्काइयो । केही समय आचार्यलाई सहरीमा सारिएकोमा अहिले फेरि राष्ट्रिय सतकर्ता केन्द्रतिर पठाइएको छ ।

सचिव आचार्यको सरुवाको बिषयमा विमल कोइरालाले सामाजिक सञ्जालबाटै सुशासनको घिनलाग्दो उदाहरण भन्दै टिप्पणी गरेका छन् । पूर्व मुख्य सचिव कोइरालाले लेखेका छन्,साढे दुई बर्षमा ७ ठाउँमा सरुवा हुने सचिव सुशासनको नारा दिने सरकारमा पाइयो । बाँकी अवधिमा सुरेश आचार्य २/ ४ ठाउँमा पक्कै लखेटिएलान । वरा,लेखाउने भए गिनिज बुकमा नाम । सुशासनको घिनलाग्दो उदाहरण ।

Advertisement 2

यस अघि सचिव रामप्रसाद थपलियालाई चार महिनासम्म विना जिम्मेवारी प्रधानमन्त्री तथा मन्त्रिपरिषद्को कार्यालयमा थन्काइएपछि उनै कोइरालाले सामाजिक सञ्जालमा टिप्पणी गरेपछि मुख्य सचिवलाई तातो लागेर हतार हतार केन्द्रीय तथ्यांक विभागमा खटाइएको थियो ।