रसुवाको पर्यटकीय क्षेत्र लाङटाङबाट मतपेटिका शनिबार मात्र सदरमुकाम धुन्चे ल्याइने भएको छ । स्थानीय तहको निर्वाचनको क्रममा शुक्रबार भएको मतदानको मतपेटिका शनिबार मात्र सदरमुकाम धुन्चे ल्याइने भएको हो ।

Advertisement 1

जिल्ला निर्वाचन कार्यालय रसुवाका निर्वाचन अधिकारी श्रीराम थापाका अनुसार लाङटाङको मतपेटिका शनिबार मात्रै सदरमुकाम धुन्चे आइपुग्ने भएको छ । पहिले हेलिकप्टरबाट मतपत्र ढुवानी गर्ने तयारी गरिए पनि पछिल्लो समय मान्छेले नै मतपेटिका ढुवानी गर्नका लागि सर्कुलर भए अनुसार शनिबार मात्रै मतपेटिका ल्याइने भएको हो ।

मतदानको मतपेटिका लाङटाङ प्रहरी चौकीमा सुरक्षित राखिएको र शनिबार बिहानै सदरमुकाम ल्याइने तयारी भइरहेको लाङटाङ क्षेत्रको मतदान गराउन खटिएका मतदान अधिकृत गोपी विश्वकर्माले बताए । लाङटाङ प्रहरी चौकीमा सुरक्षा कडाइका साथ मतपेटिका राखिएको छ । ‘शनिबार बिहानै सुरक्षा कडाइका साथ सुरक्षित रूपमा मतपेटिका लिएर सदरमुकाम आउछौं’, उनले भने, ।

Advertisement 2

लाङटाङको मतपेटिका ल्याएपछि मा गोसाईंकुण्ड गाउँपालिकाको मतगणना सुरु हुने निर्वाचन अधिकारी थापाले जानकारी दिए ।

रसुवाको गोसाईंकुण्ड गाउँपालिका–४, लाङटाङमा ८३.१९ प्रतिशत मत खसेको छ । यस वडामा ३ सय ६३ मतदाता थिए । जसमा ३ सय २ मत खसेको हो । त्यहाँ १ सय ६२ पुरुष र १ सय ४० महिलाले मतदान गरेका छन् ।

शान्तिपूर्ण तरिकाले मतदान सकिएको र मतदानपश्चात्का कार्य जारी रहेको मतदान अधिकृत गोपी विश्वकर्माले बताए । उनका अनुसार बिहान ७ बजेदेखि साँझ ५ बजेसम्म मतदान कार्य भएको थियो । गोसाईंकुण्ड गाउँपालिका–४ स्थित सामुदायिक भवनमा मतदान केन्द्र राखिएको थियो ।

निर्वाचन गराउनका लागि चार सदस्यीय टोली लाङटाङ गएको थियो । जसमा मतदान अधिकृत गोपी विश्वकर्मा, सहायक मतदान अधिकृत प्रेम शंकर प्रसाद, सहायक कर्मचारी राजकुमार थापा पहारी र कार्यालय सहयोगीको रूपमा नन्दलाल न्यौपाने खटाइएको थियो । ५ सय भन्दा कम मतदाता रहेका केन्द्रमा ४ जना कर्मचारी खटाइने प्रावधान अनुसार चार जना कर्मचारी खटाइएको हो ।