Advertisement 1

संघीय मामिला तथा सामान्य प्रशासन मन्त्रालय अनलाईन प्रणाली प्रयोग गरी स्थानीय तहबाटै आर्थिक सहायताका लागि निवेदन दिन व्यवस्था मिलाउन स्थानीय तहहरुलाई परिपत्र गरेको छ । मन्त्रालयले देशैभरका ७५३ वटै स्थानीय तहहरुलाई बैदेशिक रोजगार बोर्डको सचिवालय मातहतको वैदेशिक रोजगार नियमावली, २०६४ (पाँचौ संशोधन) मा व्यवस्था भए अनुसार स्थानीय तहबाटै आर्थिक सहायताका लागि निवेदन दिन सकिने व्यवस्था मिलाउन देशैभरका स्थानीय तहहरुलाई परिपत्र गरेको छ ।

श्रम स्वीकृति लिई वैदेशिक रोजगारीमा गएको कामदारको करार अवधिमा वा करार अवधि समाप्त भएको एक वर्षभित्र कुनै कारणले मृत्यु, अंगभंग वा गम्भीर बिरामी भएमा उनीहरुले आर्थिक सहायता उपलव्ध गराउनका लागि यस्तो व्यवस्था स्थानीय तहबाटै मिलाउन परिपत्र गरिएको हो ।

Advertisement 2

घटना घटेको मितिले एक वर्षभित्र बोर्डबाट नियमानुसारको आर्थिक सहायता वा क्षतिपूर्तिका लागि स्थानीय तह मार्फत् अनलाईन सफ्टवेयर प्रणाली ‘फेमिस’ को विकास गरी कार्यान्वयनमा ल्याइएको छ । यसका लागि श्रम रोजगार तथा सामाजिक सुरक्षा मन्त्रालयको मन्त्रीस्तर निर्णयले वैदेशिक रोजगार कल्याणकारी सूचना व्यवस्थापन प्रणाली (सञ्चालन तथा व्यवस्थापन) कार्यविधि, २०७८ समेत स्वीकृत भई कार्यान्वयनमा आएको छ । उक्त कार्यविधिको दफा ४ मा उल्लेखित सबै सेवाहरु बोर्डको सचिवालयबाट अनलाइन प्रणाली मार्फत् उपलब्ध गराइने वैदेशिक रोजगार बोर्डले जनाएको छ ।