सहायक वन अधिकृतको चुनौती- समाज रुपान्तरणको औकात भए खुला बहस गर
आफूलाई नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीका कार्यकर्ता बताउने व्यक्तिहरुले कैलालीको पचमुडिया सवडिभिजन कार्यालयका सहायक वन अधिकृत विश्वराज पण्डितलाई मोसो दलेका छन् ।
Advertisement 1
पण्डित आफैंले उक्त तस्वीर सार्वजनिक सामाजिक सञ्जालमा पोष्ट गर्दै चरित्रमा दाग नलागुन्जेलसम्म अनेक रंग पोतेर केही फरक नपर्ने उल्लेख गरेका छन् । साथै उनले मासो दल्नेहरुलाई समाज रुपान्तरणको औकात छ भने खुल्ला बहस गर्न चुनौती पनि दिएका छन् ।
गएको पुसमा नेकपा जिल्ला कार्यसमितिले भजनी नगरपालिकास्थित लक्ष्मी, सयपत्री लगायतका सामुदायिक वन उपभोक्ता समितिसँग सहयोग भन्दै तीन लाख रुपियाँसम्म उठाएको थियो । नेकपाले चन्दा मागेको भन्दै सहायक वन अधिकृत पण्डितले त्यसको विरोध गरेका थिए ।
सहायक वन अधिकृत पण्डितमाथि भएको घटना निन्दनीय रहेको भन्दै प्रजातान्त्रिक वन प्राविधिक सङ्घका अध्यक्ष रामऔतार चौधरीले दोषीलाई कानूनी कठ्घरामा उभ्याउन र कारबाही गर्न माग गरेका छन्। यसैगरी, वन कर्मचारीहरुको सुरक्षाको ग्यारेन्टी गर्नपनि वनकर्मीहरुको माग छ ।
Advertisement 2
यसैबीच, आफूमाथि मोसो दलिएको तस्बिर सामाजिक सञ्जालमा पोष्ट गर्दै सहायक वन अधिकृत पण्डितले नेकपाका कार्यकर्तालाई समाज रुपान्तरणका लागि खुल्ला बहस गर्न चुनौती दिएका छन् । उनले लेखेका छन्–‘चरित्रमा दाग नलागुञ्जेलसम्म अन्य अनेकौं रङ पोतेर केही फरक पर्नेवाला छैन । समाज रुपान्तरणको लागि यदि औकात छ भने खुला बहस गर्न चुनौती दिन्छु ।’
