करार सेवाका कर्मचारीलाई काखी च्याप्ने तर लोकसेवा भिडेर नाम निकालेका र स्थायी नियुक्ति लिएका कर्मचारीलाई हेप्ने रोग सिंहदरबार हुँदै गाउँ गाउँका सिंहदरबारतिरसम्म पुगेको छ ।
यस्तै दृश्य देखिएको हो दैलेखको दुल्लु नगरपालिकामा । त्यहाँ हाजिर हुन गएका एक कर्मचारीको हाजिरी नै च्यातिदिनेसम्मको घटिया हर्कत भएको पाइएको छ । यस्तो स्थीतिमा पुर्याइएका कर्मचारी हुन मदन बहादुर बुढा । उनी आलेप पाँचौ तहका कर्मचारी हुन ।
यस अघि बुढा हुम्लाको एक स्थानीय तहमा कार्यरत थिए । त्यहाँबाट सरुवा भएर आए दैलेखको भगवतिमाई गाँउपालिकामा । तर सो पालिकामा एकैतहका २ कर्मचारी भए पछि उनी सरुवा भएर जान सकिने ठाउँको खोजीमा लागे । उनले दुल्लु नगरपालिकामा दरबन्दी रिक्त रहेको भेटे ।
सो स्थानीय तहमा सरुवा मिलाए । त्यहाँको प्रमुख प्रशासकीय अधिकृत महेन्द्रजंग शाहीले अनुमति पनि दिए । त्यसपछि संघीय मामिला सामान्य प्रशासन मन्त्रालयबाट काज सरुवा मिलाएर उनी दुल्लु नगरपालिकामा पुगे ।

Advertisement 1

गत ७ गतेबाटै उनी दुल्लु नगरपालिकामा हाजिर भएका थिए । तर हाजिर भएको तेश्रो दिन नै उनको हाजिरीको पाना नै च्यातिदिए । बरु सात गते नै त्यहाँका मेयर घनश्याम भण्डारीले संघीय मामिला तथा सामान्य प्रशासन मन्त्रालयलाई पत्र लेख्दै उक्त दरबन्दी रिक्त नभएको र कार्यालयको सहमति विना नै कर्मचारी खटाउने काम भएकोले सो काम कर्मचारी समायोजन ऐन ०७५ र स्थानीय सरकार सञ्चालन ऐन विपरित भएको देखाउँदै बुढालाई दुल्लु नगरपालिकामा हाजिर नगराई फिर्ता पठाइएको व्यहोराका पत्र पठाइएको छ ।
नगरपालिका स्रोतका अनुसार,१३ वटा वडा कार्यालय रहेको सो पालिकाभित्र अधिकांश करारका कर्मचारीहरु कार्यरत छन् । जहाँ वडा नम्बर ३,१२ र ८ तीन सचिवमात्र स्थायी छन् बाँकी सबै करारका कर्मचारी राखेर काम चलाइएको छ ।
कर्मचारीहरुका अनुसार,हाजिर च्यात्ने काम मेयर घनश्याम भण्डारीकै निर्देशनमा भएको आरोप लगाएका छन् ।
हाजिरी च्यातिएको बिषय प्रमुख जिल्ला अधिकारी हरि प्याकुरेलसमक्ष समेत पुगिसकेको छ । उनले प्रमुख प्रशासीय अधिकृत महेन्द्रजंग शाहीलाई नै सामान्यले काज सरुवा गराएको कर्मचारी मदन बुढालाई हाजिरी गर्ने व्इवस्था मिलाउने र उनको हाजिरी च्यात्ने कर्मचारी पहिचान गरी उनीमाथि कारवाही गर्न निर्देशन दिइसकेका छन् ।