एफएनसीसीआई र दराज नेपालबीच सम्झौता
निजी क्षेत्रको छाता संस्था नेपाल उद्योग वाणिज्य महासंघ (एफएनसीसीआई)ले साना तथा मझौला उद्योग (एफएमईज) का उत्पादनहरूलाई राष्ट्रियरअन्तर्राष्ट्रिय ग्राहकसम्म पुर्याउन अनलाइन बजार दराज नेपालसँग सहकार्य सुरु गरेको छ । एफएनसीसीआई र दराज नेपालबीच बिहीबार भएको सम्झौतामा एफएनसीसीआईका अध्यक्ष शेखर गोल्छा र दराजका प्रबन्ध निर्देशक लिनो अहलरिङले हस्ताक्षर गरेको छ ।
Advertisement 1
सम्झौता अनुसार अब महासंघसँग जोडिएका साना तथा मझौला उद्यमीहरूलाई दराजको अनलाइन सपिङमा एकीकृत गरी उनीहरूका उत्पादनलाई दराजमार्फत बिक्री गर्न पाइनेछ । साना तथा मझौला उद्योग (एसएमइज)ले एक वर्षको लागि दराजको अनलाइन सपिङमा निःशुल्क डिस्प्लेको सुविधा पाउनुको साथै त्यसका लागि आवश्यक प्रचार, दृश्यतासँगै थप सुविधासमेत पाउनेछन् । यस्तै साना तथा मझौला उद्योगहरूलाई आफ्नो अनलाइन व्यापार वृद्धि गर्नको लागि आवश्यक शिक्षा र सीपहरू समेत दराजले प्रदान गर्नेछ ।
हाल दराजले काठमाडौं, पोखरा, विराटनगर, भरतपुर, वीरगन्ज, जनकपुर, बुटवल, धनगढी र बिर्तामोडका १२ हजारभन्दा बढी बिक्रेतालाई सेवा प्रदान गरिरहेको छ । यी बिक्रेताहरूले नेपालका ४७ भन्दा बढी सहरमा आफ्ना उत्पादन तथा सेवा प्रदान गरिरहेका छन् । सम्झौता अनुसार विशेष रूपमा तयार गरिएका अभियानमार्फत थप प्रचार र दृश्यता प्राप्त गर्ने, जनवरी २०२२ देखि डिसेम्बर २०२२ सम्म एसएमईजको लागि कुनै शुल्क नलाग्ने, व्यापक ई–कमर्स प्रशिक्षण तथा शिक्षा दिने र दर्ता र अनलाइन पसल स्थापनामा दराजले सहयोग गर्नेछ । यस्तै महासंघले आफ्नो नेटवर्कमार्फत सबै एसएमइजका उत्पादनलाई दराजको अनलाइन सपिङमा जोड्न पहल गर्ने छ ।
Advertisement 2
सम्झौतापत्र हस्ताक्षर समारोहलाई सम्बोधन गर्नुहुँदै महासंघका अध्यक्ष गोल्छाले दराजसंगको यो सहकार्य एसएमईजहरूको पुनरूत्थानमा कोशेढुंगा हुने बताए । उनले दक्षिण तथा दक्षिण पूर्वी एशियामा दराजको लोकप्रियता बढ्दै गएकाले दराजको अनलाइन सपिङ प्ल्याटमार्फत साना तथा मझौला उद्यमीहरूले आफना उत्पादन स्वदेशी एवं विदेशी ग्राहकसम्म पुर्याउन सकुन भन्ने उद्देश्यले महासंघले अग्रसरता लिएको स्पष्ट पारे ।
महासंघका वरिष्ठ उपाध्यक्ष चन्द्र प्रसाद ढकालले महासंघले एसएमईजको पुनरुत्थानका लागि बजारीकरणमा सहयोग गर्ने क्रममा दराजसँग यो सहकार्य गरेको र यसले साना तथा मझौला उद्योगका उत्पादनको राष्ट्रिय एवं अन्तर्राष्ट्रिय बजारीकरणमा ठूलो सहयोग पुग्ने र यसबाट संकटमा रहेको यो क्षेत्रले ठूलो लाभ लिन सक्ने बताए । सम्झौताबाट नेपालका अन्य क्षेत्रबाट थप बिक्रेताहरूलाई दराजमा भित्र्याउन र व्यावसायिक सफलता हासिल गर्न सहयोग गर्ने विश्वास गरिएको दराजका प्रबन्ध निर्देशक लिनो अलरिङ्गले बताए ।
