नेकपा एमालेका अध्यक्ष केपी ओली चाहन्थे १० औं राष्ट्रिय महाधिवेशनबाट सर्वसहमतबाट नयाँ नेतृत्व चयन गर्न सकोस । उनले त्यही ढंगले प्रयास पनि गरे तर अन्तत केपी शर्मा ओलीको चाहनामा धक्का लागेको छ । सर्वसम्मतीबाट नेतृत्व चयनका लागि हिजो रातको तीन बजे ओलीले १९ पदाधिकारी र ३०१ केन्द्रीय सदस्यको सूची बन्दसत्रमा पेस गरे पनि भीम रावल, घनश्याम भुसाललगायत नेताले निर्वाचन नै गर्नुपर्ने अडान लिएपछि एमाले महाधिवेशन अन्ततः चुनावी प्रक्रियामा गएको छ ।
जसअनुसार,उम्मेद्धारी दर्ताको समय सकिदासम्म पदाधिकारीको १४ पदका लागि निर्वाचन हुने भएको छ। नेकपा एमालेमा वरिष्ठ उपाध्यक्ष, एक महासचिव र तीन उपमहासचिव निर्विरोध चयन भएका छन् । वरिष्ठ उपाध्यक्षमा ईश्वर पोखरेल, महासचिवमा शंकर पोखरेल, उपमहासचिवमा प्रदीप ज्ञवाली, पृथ्वी सुब्बा गुरुङ र विष्णु रिमाल निर्विरोध निर्वाचित भएका हुन्।

Advertisement 1

महाअधिवेशन भनिए पनि ओलीले निर्वाचन नगर्ने तर आफ्नो गोजीबाट नाम सार्वजनिक गर्न तयारी थियो । सोही अनुरुप आइतबार राती तीन बजेतिर ३०१ सदस्यीय केन्द्रिय कमिटि र १९ सदस्यीय पदाधिकारीको नाम सार्वजनिक गरे पनि भीम रावल काठमाडौंबाटै अध्यक्ष पदमा भिड्ने बताउँदै आएका थिए । सौराहा पुग्दा पनि उनको अडान कायमै रह्यो । रावलकै साथमा उभिए घनश्याम भुषाल । पदाधिकारीमा आफ्नो नाम नपरेपछि सोमबार भीम आचार्य र टंक कार्कीले समेत उम्मेद्धारी दिएका छन् ।
बाँकी १४ पदमध्ये अध्यक्षमा केपी शर्मा ओलीसँग भीम रावलको भीडन्त हुने भएको छ । यस्तै उपाध्यक्ष घनश्याम भुसालले समेत उम्मेद्धारी दिएका छन् । अब उपाध्यक्षमा पनि निर्वाचन हुने भएको हो। एमालेमा ६ जना उपाध्यक्षको व्यवस्था रहेको छ।

उपाध्यक्षहरूमा युवराज ज्ञवाली, अष्टलक्ष्मी शाक्य, सुरेन्द्र पाण्डे, रामबहादुर थापा बादल, विष्णु पौडेल र सुवासचन्द्र नेम्वाङको नाम आइतबार राति घोषणा गरेका थिए। त्यस्तै सचिवमा पनि चुनाव हुने भएको छ।
यस्तै सचिवमा ओलीको लिष्टमा नअटाएका भीम आचार्य र पूराना कम्युनिष्ट नेता टंक कार्कीले उम्मेद्धारी दिएका छन् । एमालेमा सात जना सचिव रहने व्यवस्था भएको छ । ओलीले यसअघि टोपबहादुर रायमाझी, छविलाल विश्वकर्मा, रघुवीर महासेठ, लेखराज भट्ट, योगेश भट्टराई, गोकर्ण विष्ट र पद्मा अर्याललाई सचिव बनाएका थिए। एमालेमा पदाधिकारीका १४ पदका लागि १८ जना चुनावी प्रतिस्पर्धामा उत्रिएका छन्। एमाले महाधिवेशनमा कुल प्रतिनिधिको संख्या २ हजार १ सय ७५ रहेको छ।