सरकारले केही सचिवहरुको सरुवा गर्ने तयारी गरिरहेको छ । अस्ति सोमबारको क्याविनेट बैठकबाट केही सचिवहरुको सरुवा सम्बन्धी निर्णय भए पनि त्यो सार्वजनिक गरिएको छ । प्रधानमन्त्री तथा मन्त्रिपरिषद् कार्यालय स्रोतका अनुसार, रविलाल पन्थ,डा दामोदर रेग्मी र रामप्रसाद थपलियाको सरुवा सम्बन्धी निर्णय भए पनि सार्वजनिक नगरिएको हो ।
सचिवमा बढुवा भएर महिनौ दिनदेखि जगेडामा राखिएका रविलाल पन्थलाई गण्डकी प्रदेशको प्रमुख सचिवको रुपमा खटाइएको छ । पन्थले यस अघि विभिन्न जिल्लाहरुमा प्रमुख जिल्ला अधिकारीको भूमिका कुशलतापूर्वक निर्वाह गरेका छन् भने लुम्विनी प्रदेशको प्रदेश सचिवको जिम्मेवारी निर्वाह गरिसकेका छन् । गत महिना सचिव बढुवा भएका पन्थलाई कुनै जिम्मेवारी नदिई राखेपछि उनको दैनिकी बनेको थियो,कार्यालय पुग्ने र हाजिर गरेर फर्कने ।
यस्तै,सो प्रदेशका प्रमुख सचिवको जिम्मेवारीमा रहेका डा दामोदर रेग्मीलाई शिक्षा मन्त्रालयमा तानिएको छ । रेग्मीले गण्डकी प्रदेशको शिक्षा नीति, प्रदेश प्रमुख शैक्षिक सुधार योजना, साक्षर गण्डकी प्रदेश घोषणा ,अभिभावक विहीन विद्यार्थीहरुको लागि छात्रवृत्ति, गण्डकी विश्व विद्यालयको शैक्षिक योजना गण्डकी, प्राविधिक शिक्षालयको शैक्षिक योजना निर्माणमा महत्वपू्र्ण योगदान दिएका छन् ।
शिक्षा सचिव रामप्रसाद थपलियालाई युवा तथा खेलकुद मन्त्रालयमा पठाइएको छ । खेलकुद मन्त्रालय डेढ महिनादेखि रिक्त छ । तत्कालीन सचिव केदार न्यौपाने ५८ बर्षे उमेर हद लागेर गत १२ असोजमा घर फर्किएसँगै सो मन्त्रालय सचिवबिहिन छ । अहिले सो मन्त्रालयका सहसचिव कमलप्रसाद पोखरेललाई निमित्त सचिवको जिम्मेवारी दिइएको छ ।
थपलिया यस अघि नै युवा तथा खेलकुद मन्त्रालयमा रहँदा राष्ट्रिय खेलकुद परिषदको पदाधिकारी तथा कार्य व्यवस्थापन युवा स्वरोजगार व्यवस्थापन र समृध्द नेपाल निर्माणमा युवाहरुको भूमिका वारे कार्ययोजना तयार गरेका थिए । युवा तथा खेलकुद मन्त्रालयको भुमिका प्रभावकारी वनाउन विभागीय मन्त्री महेश्‍वरजंग गहतराजले राम प्रसाद थपलियालाई युवा तथा खेलकुद मन्त्रालयको सचिव बनाउन खोजेको भए पनि थपलियाले पहिला काम गरिसकेको मन्त्रालयमा पुन गएर काम गर्न अनिच्छा देखाएका छन् । उनलाई प्रधानमन्त्री तथा मन्त्रिपरिषद्को कार्यालयमा तानेर प्रम कार्यालयबाट कुनै सचिवलाई युवा तथा खेलकुद मन्त्रालयमा खटाइने तयारी चल्दैछ ।थपलियाले युवा तथा खेलकुद मन्त्रालयमा जान अनिच्छा देखाएका कारण सोमबार सचिव सरुवाको निर्णय सार्वजनिक नभएको त्यो स्रोतको भनाई छ ।

Advertisement 1

अहिले कृषि मन्त्रालय र युवा तथा खेलकुद मन्त्रालय सचिव बिहिन छ । सोमबारमात्र निरु दाहाल पाण्डे सचिवमा बढुवा भएकी छिन् । उनको पदस्थापन हुन बाँकी छ । यस्का अलवा केही प्रदेशका प्रमुख सचिवहरुको अन्तर प्रदेश सरुवा गर्ने सूची समेत तयार भएको प्रधानमन्त्री कार्यालय स्रोतले जनाएको छ ।
प्रधानमन्त्री कार्यालय स्रोतका अनुसार भोली बस्ने क्याविनेटले सचिवहरुको सरुवाको सूची सार्वजनिक गर्नेछ ।