केदार पनेरुको कविता :-साटिन्छ
उ वेलामा नुनसंग सुन अरे
जिम्वुसंग पीठो
पाखीसंग चामल साटिन्थ्यो
वाक्ला वाक्ला वख्खु लाउनेहरु
दुई चुल्ठी वाट्नेहरु
अचेल हाम्रो शहरमा आउदै आउदैनन्
घिउसंग चामल अरे
काफलसंग गहुं
अनि जामुन संग मकै साट्नेहरु
पिठ्युमा डोको बोकेर
अचेल हाम्रो शहरमा आउदै आउदैनन्
अव त हाम्रो शहरमा
कोही केही साट्न आउदैनन्
अचेल यहां नगदमै कारोवार हुन्छ रे
यहां ईमान पनि नगदमै
दल पनि नगदमै साटिन्छ रे
दण्डा पनि नगदमै
अनि झण्डा पनि नगदमै साटिन्छ रे ।
अव त यो शहरमा अचेल
समाचार पनि साटिएको छ रे
सडकमा हुनेहरु सिंहदरवारमा
सिंहदरवारकाहरु सडकमा साटिएका छन्
निर्मलाका खुनीहरु हराउने शहरमा
गंगामायाहरुको व्यथा चर्किने शहरमा
अचेल त गन्धर्वको धुन पनि हराउन थालेको छ रे ।
(आइसोलेशन)
प्रकाशित :२०७८ श्रावण १२, मंगलवार ०९:०४
यो खबर पढेर तपाईलाई कस्तो महसुस भयो ?
0%
like
0%
love
0%
haha
0%
wow
0%
sad
0%
