प्रशासनिक संयन्त्र चलाउने ५ सचिवको पद अझैं रिक्त छ । गत चैत्रदेखि लोकसेवा आयोग पदाधिकारीबिहिन हुँदा एकै पटक १० सचिव पद रिक्त रहेकोमा अहिले ५ पदपूर्ति भइसकेको छ भने ५ सचिव पद अझैं रिक्त रहेको देखिन्छ । लोकसेवाले पूर्णता पाएसँगै पछिल्लो दुई साताबीच सात जना सचिव बढुवा भइसकेका छन् । तीमध्ये पाँच जनाको पदस्थापन भएको छ भने दुईको पदस्थापन हुँनै बाँकी छ ।
आयोगले पूर्णता पाएसँगै दामोदर रेग्मी,मधुसूदन बुर्लाकोटी, सुशीलचन्द तिवारी,प्रमिला बज्राचार्य, गणेशप्रसाद पाण्डे र डा कृष्णप्रसाद आचार्य सचिवमा बढुवा भइ पदस्थापन भइसकेका छन्। गणेश पाण्डेलाई कर्णाली प्रदेशको प्रमुख सचिवको रुपमा र डा दामोदर रेग्मीलाई गण्डकी प्रदेशको प्रमुख सचिवको रूपमा पदस्थापना भइसकेका छन् । यस्तै इन्जिनियरिङतर्फका कृष्ण आचार्यलाई कृषि मन्त्रालयमा र प्रमिला देवी शाक्य बज्राचार्यलाई खानेपानी मन्त्रालयमा,राजेन्द्र प्रसाद खनाललाई नेपाल ट्रष्टको कार्यालयमा पदस्थापन गरिएको छ । यस्तै ओलीको अन्तिम क्याविनेटले बढुवा सिफारिस गरेका कृष्णहरि पुष्कर र खगेन्द्रप्रसाद नेपालको पदस्थापन भएको छैन।
दुई सचिवको पदस्थापना हुनै बाँकी छ ।
अहिले प्रधानमन्त्री तथा मन्त्रिपरिषद्को कार्यालयमा तीन सचिव पद रिक्त छ । राष्ट्यिर मानव अधिकार आयोग र रक्षा मन्त्रालय पनि सचिव बिहिन छ ।
आगामी सोमबार बस्ने क्याविनेटले दुई सहसचिवलाई सचिवमा बढुवा गर्नेछ । जसअनुसार २० प्रतिशतबाट किरणराज शर्मा सचिवमा बढुवा हुनेछन् भने रामप्रसाद घिमिरे, हरि कुमार मैनाली र डिल्लीराज शर्माको नाम सिफारिस गरेको हो । यी तीन मध्ये मन्त्रिपरिषद्ले एक जना बरिष्ठ सह सचिवलाई सचिवमा बढुवा गर्नेछ ।