यही २०८३ भदौ १० गते बिहान करीब पौने ९ बजे तिर तिब्बत हुदै रसुवा जिल्लाको उत्तरी सीमाबाट नेपाल प्रवेश गरेको भोटे कोशीमा आएको बाढीले गरेको धनजनको क्षति अपूरणीय देखियो। यो प्राकृतिक प्रकोपलाई देश विदेश र अन्तर्राष्ट्रिय समुदायले निकै चासो र चिन्ताको विषय बनाएका छन् जुन स्वभाविक पनि हो।

Advertisement 1

यो प्रकोप संग नेपाली जनता र सरकार संगै मित्र राष्ट्र र अन्तर्राष्ट्रिय समुदायले सक्दो सहयोग गरेका र गर्ने प्रतिवद्धता जनाएका छन् जुन सकारात्मक छ। विश्व कै ध्यान आकृष्ट भएको यस प्राकृतिक ( दैवी) प्रकोपमा नेपाल सरकारबाट नै यसको ब्यबस्थापनमा अग्रसरता लिएर प्राप्त सहयोग समेतका आधारमा उद्धार, राहत र पुनस्र्थापनको यो परीक्षामा खरो रूपमा उत्रन आवश्यक हुन्छ।

यस सन्दर्भमा प्राकृतिक प्रकोपका विषयमा विश्वमा प्रयोग भएका राहत तथा उद्धारका आवश्यक चरणहरू पस्कने अनुमति चाहन्छु, जुन यस प्रकार छन्।

यस पटक भोटे कोशीमा आएको बाढी अकल्पनीय रूपमा आएको हो र यसको क्षति समेत सोचे भन्दा बढी नै भएको छ। यो बाढीको असर नदी किनारका बस्ती बस्ती र राजमार्गहरूमा सघन रूपमा परेको हुदा कतिपय ठाऊमा बस्तीहरू नै सखाप भएका छन्। फेरि यो प्रकोप त्यस्तो बेला आएको छ जुन बेला रसुवामा पर्ने मुख्य धार्मिक तथा पर्यटकीय स्थल गोसाईंकुण्डमा मेला भर्न जाने तिर्थालु जाने बेला परेको थियो र त्यसै गरी यो मार्ग समस्त हिन्दू धर्मावलम्बीको आस्थाको केन्द्र मानसरोवर जाने बाटो र समयमा परेकोले पनि अन्तर्राष्ट्रिय पर्यटकहरू समेत यस प्रकोपमा परेका हुन सक्छन्। यी विभिन्न कारणले आततायी हुने हरूको संख्या पक्कै पनि सोचे भन्दा बढी हुनु पर्छ।

संचार माध्यमबाट प्राप्त जानकारी अनुसार सो प्रकोपबाट मृत्यु हुनेको संख्या हाल सम्म ४०० भन्दा बढी रहेको छ र यो प्रकोपको सघनता हेर्दा यो संख्या बढ्ने निश्चितै छ। यसरी शवको संख्या मात्र बढ्ने हैन कि यसको क्षेत्र समेत चीनको सीमा देखि भारतको सीमा सम्म त्रिशुली नदीको किनाराहरूमा फैलिएको हुदा यी शवको ब्यबस्थापन नै चुनौतिको रूपमा देखिन्छ। यसबाट आउने दुर्गन्धको कारण फैलिन सक्ने रोगको प्रकोप झनै डरलाग्दो हुन सक्छ। त्यसैले यो विषयमा उद्धारकर्मीहरू संवेदनशील हुनु पर्छ।

यो प्रकोपले देशको समस्त प्रणालीलाई जीवन दिने राजमार्गहरूको कनेक्टिभिटीलाई सूचारू गराउन र सो प्रकोपका कारण प्रभावित विद्युत गृहको पुनर्निर्माण समेत अर्को चुनौतिको रूपमा देखिएको छ। नेपाल पटक पटक यस्ता प्रकोपहरूको सामना गरी अघि बढी रहेको सन्दर्भमा विगतका अनुभवहरूबाट पाठ सिकी यस पटकको यो प्रकोपबाट सो क्षेत्र र त्यहाका जनतालाई राहत प्रदान गर्न सरकार सफल होस् भन्ने कामना छ।