काठमाडौं । नेपाल सरकार (मन्त्रिपरिषद्)को २०८३ साउन २० गतेको निर्णयअनुसार राजपत्राङ्कित प्रथम श्रेणीका कर्मचारी मुक्तिराम अर्याललाई काठमाडौं महानगरपालिकाको प्रमुख प्रशासकीय अधिकृतको जिम्मेवारीमा खटाइएको छ। उनी यसअघि पोखरा महानगरपालिकाको प्रमुख प्रशासकीय अधिकृतका रूपमा कार्यरत थिए र अब काठमाडौं महानगरमा कामकाजका लागि पठाइएको हो।

Advertisement 1

काठमाडौं महानगरका प्रमुख प्रशासकीय अधिकृत सरोज गुरागाईं उमेर हदका कारण अनिवार्य अवकाशमा गएपछि रिक्त रहेको प्रशासनिक नेतृत्व सरकारले अर्यालमार्फत भरिएको हो।

नेपाल प्रशासन सेवाका अनुभवी अधिकृतका रूपमा परिचित अर्यालले संघीय तथा स्थानीय तहमा विभिन्न प्रशासनिक जिम्मेवारी सम्हालिसकेका छन्। पछिल्ला वर्षहरूमा पोखरा महानगरपालिकाको प्रमुख प्रशासकीय अधिकृतका रूपमा कार्यरत रहँदा उनले सेवा प्रवाह, प्रशासनिक समन्वय, योजना कार्यान्वयन तथा स्थानीय सरकारको संस्थागत व्यवस्थापनमा नेतृत्वदायी भूमिका निर्वाह गरेका थिए।

काठमाडौं महानगरपालिकामा प्रमुख प्रशासकीय अधिकृतको जिम्मेवारीलाई स्थानीय सरकारकै सबैभन्दा चुनौतीपूर्ण प्रशासनिक पदमध्ये एक मानिन्छ। निर्वाचित जनप्रतिनिधि र कर्मचारी प्रशासनबीच समन्वय कायम गर्दै सेवा प्रवाहलाई प्रभावकारी बनाउने जिम्मेवारी यही पदमा रहने भएकाले अर्यालको कार्यशैलीलाई चासोका साथ हेरिएको छ।

मन्त्रिपरिषद्को निर्णयसँगै काठमाडौं महानगरपालिकाले नयाँ प्रमुख प्रशासकीय नेतृत्व पाएको छ भने आगामी दिनमा महानगरको प्रशासनिक सञ्चालन र विकास आयोजनाको कार्यान्वयनमा नयाँ गति आउने अपेक्षा गरिएको छ।