बाँके। नेपालगन्ज–गुलरिया हुलाकी राजमार्गअन्तर्गत खजुरा गाउँपालिका–३ स्थित पेडारी नालामा ४ लेन पुल निर्माण समयावधि अगावै सम्पन्न भएको छ।

Advertisement 1

पुल निर्माण सम्पन्न गर्ने सम्झौता २०८३ वैशाख १८ गतेसम्म भए पनि हाल पुल निर्माण कार्यसम्पन्न भएर पुल सञ्चालनमा आइसकेको हुलाकी राजमार्ग निर्देशनालय योजना कार्यालय नेपालगन्जका योजना प्रमुख लीलाबहादुर भण्डारीले जानकारी दिए।

“खजुरावासीले भोगिरहेको लामो समयदेखिको सास्ती अब अन्त्य भएको छ”, उनले भन्नुभयो, “निर्माण कम्पनीले तोकिएको समयभन्दा अगावै काम सम्पन्न गरी पुल सञ्चालनमा आइसकेको छ।”

Advertisement 2

काम छिटो गर्ने नाममा गुणस्तरमा सम्झौता नहोस् भन्नका लागि हुलाकी राजमार्ग निर्देशनालयले नियमित रूपमा कार्यस्थलमै पुगेर अनुगमन गरिएको उनको भनाइ छ। नेपालगन्ज–गुलरिया सडकखण्डकै लाइफ लाइन मानिने यो पुलले बाँके र बर्दियाको आवागमनलाई थप सहज र सुरक्षित बनाउने विश्वास गरिएको छ।

नयाँ निर्माण भएको पुल २२ मिटर चौडाइ र ३४.४ मिटर लम्बाइको छ। यसैगरी पुलको दुवैतर्फ २०० मिटर एप्रोच सडक पनि निर्माण गरिनेछ। नारायणम निर्माण सेवासँग २०८३ वैशाख १८ गतेभित्र निर्माण सम्पन्न गर्नेगरी भ्याटसहित रु ८ करोड ९६ लाखमा ठेक्का सम्झौता भएको थियो।

खजुरा गाउँपालिका अध्यक्ष डम्बर विकले खजुरावासीको निरन्तरको पहलले यो काम सम्भव भएको उल्लेख गर्दै भने, “खजुरावासीको लामो समयदेखिको सपना पूरा भएको छ, निर्माण कम्पनीको काम गर्ने शैलीबाट हामी सबै उत्साहित छौँ।”

उनका अनुसार खजुराका स्थानीय बासिन्दामात्र होइन, यहाँबाट दैनिक ओहोरदोहोर गर्ने यात्रीहरू पनि पुल निर्माण समयअगावै निर्माण हुँदा खुसी छन्। वर्षाको समयमा नाला थुनिएर सडकमा पानी आउँदा घण्टौँसम्म यातायात अवरुद्ध हुने समस्या अब इतिहास बन्नेछ।

खजुरामा ४ लेन सडक भए पनि वर्षौँ पहिले निर्माण भएको साँघुरो र जीर्ण पुल भएका कारण सानो वर्षात्मा समेत नालाको पानी सडक भएर बग्दा वर्षायाममा आवागमन प्रभावित हुने गरेको थियो।
–––