सरकारी नियुक्तिहरु कतिसम्म भद्रगोल हुन थाले भने एउटा मान्छे दोहोरो सरकारी नियुक्तिमा छ । तर, ऊ कहाँ र कसको रुचीमा नियुक्ति भएका छन् भन्ने कुराको जानकारी कसैलाई हुँदैन ।
बरु, कोही अख्तियारका प्रमुख आयुक्त प्रेम राईको नाम लिँदै, त कोही प्रधानमन्त्रीका विदेश मामिला सल्लाहकार डा.राजन भट्टराईको नाम लिँदै कर्मचारी तर्साइरहेका छन् । जबकी, ती व्यक्तिहरुलाई उनीहरुका गतिविधिबारे कुनै जानकारी छैन ।
पुस ५ मा प्रतिनिधिसभा विघटनलगत्तै पशुपति क्षेत्र विकास कोषको सदस्य पदमा नियुक्ति पत्र बुझेका थिए, झापाका देवीप्रसाद बरालले । योगेश भट्टराई संस्कृति, पर्यटन तथा नागरिक उड्डयनमन्त्री भएकै बेला सचिव केदारबहादुर अधिकारीले बरालको नियुक्तिका लागि टिप्पणी उठाएका थिए । तर, योगेशको असहमतिका कारण रोकिएको नियुक्तिपत्र पुस ५ पछि भानुभक्त ढकाल पर्यटन मन्त्री हुनासाथ बरालले बुझे । उनले नियुक्ति पत्र बुझेपछि मात्रै मन्त्रालयमा होहल्ला भयो कि, उन त्यसअघि नै उदयपुर सिमेन्ट कारखानाको सञ्चालक समिति सदस्यमा नियुक्त भइसकेका रहेछन् ।
नेपालको कुनै पनि ऐन, कानुनले एउटै व्यक्तिलाई दोहोरो सरकारी नियुक्ति दिने व्यवस्था गरेको छैन । यदि कसैले त्यस्तो नियुक्ति पाएमा पछिल्लो नियुक्ति स्वतः खारेज हुनेसम्मको प्रावधान छ । तर, बराललाई कुनै पनि नियम–कानुनले छेकेको छैन । बरु, उनले पुरानो मितिको नियुक्तिपत्र बुझेर पुस दोस्रो साता पशुपति क्षेत्र विकास कोषमा बहाली हुन गएलगत्तै नियुक्तिपत्रमा उल्लेखित मितिका आधारमा विभिन्न किसिमका भत्ता र सुविधाबापतका रकम एकमुष्ट बुझे ।
उनलाई त्यस्तो रकम दिन कर्मचारीहरुले अनाकानी गरे । तर, भर्खरै अख्तियारको प्रमुख आयुक्तमा सिफारिस भएका प्रेम राईको नाम लिँदै कर्मचारीहरुलाई तर्साएपछि नियम विपरितको भुक्तानी पनि लिएको कोषका एक कर्मचारी बताउँछन् ।
पशुपति क्षेत्र विकास कोषमा मात्रै होइन, उदयपुर सिमेण्ट कारखानासम्म नै बराल प्रेम राईको नाममा आफ्नो हैकम जमाइरहेका छन् । तर, उनका यस्ता क्रियाकलापबारे प्रमुख आयुक्त राई भने अनविज्ञ छन् ।
यसअघि नेपाल आयल निगमको सञ्चालक समितिको सदस्य र जडिबुटी उत्पादन तथा प्रशोधन कम्पनी लिमिटेडको महाप्रवन्धक रहँदा पनि विवादास्पद बनेका व्यक्ति हुन्, बराल ।
पशुपति क्षेत्र विकास कोषमा प्रधानमन्त्रीका विदेश मामिला सल्लाहकार डा राजन भट्टराईको नाम लिएर आतंक मच्चाउने अर्की पात्र हुन्, आशा पाण्डे ।
उनी बागमति अभियन्ताका रुपमा परिचित र डा भट्टराईको निर्वाचन क्षेत्रकी बासिन्दा हुन् । उनले विभिन्न खरिदका टेण्डरहरुमा पति र भाइहरुको फर्मबाट सहभागी गराउने र टेण्डर नपरेमा डा भट्टराईको नाम लिँदै कर्मचारी आतंकित बनाउने गरेको गुनासो कोषका केही कर्मचारीले गरेका छन् ।
कोषको नयाँ सदस्यका रुपमा नियुक्त भएका भगवतिप्रसाद देव पेशाले अनमी हुन् । जग्गा नापजाँच गर्ने व्यक्तिको काम धार्मिक संस्थामा त्यति हुँदैन । तर, उनी त्यहाँ सदस्य नियुक्त भएपछि अहिले पशुपतिनाथ मन्दिरको लालपुर्जाको खोजी गर्ने काम भइरहेको छ । त्यही नाममा कोषबाट ४० देखि ४५ लाख रुपैयाँसम्म घोटाला भएको चर्चा कर्मचारीबीच हुने गरेको छ ।