काठमाडौं । लोक सेवा आयोगका अध्यक्ष माधवप्रसाद रेग्मी काठमाडौं उपत्यका बाहिर रहेका कारण सचिव बढुवा प्रक्रिया रोकिएको छ । अहिलेसम्म दुई जना सचिवको पद रिक्त रहेकोमा आयोगका अध्यक्षको अध्यक्षतामा बस्ने सचिव बढुवा सिफारिस समितिको बैठक बस्न नपाएका कारण सचिव बढुवा प्रक्रिया रोकिएको हो ।

Advertisement 1

लोक सेवा आयोगको कामले नै आयोगका अध्यक्ष माधवप्रसाद रेग्मी एक सातादेखि उपत्यका बाहिर रहेको आयोगका सचिव राजकुमार श्रेष्ठले  जानकारी दिए । उनका अनुसार अबको एक दुई दिन भित्रमा नै आयोगका अध्यक्ष फर्किने कार्यतालिका रहेको छ ।

एक दुई दिन भित्रैमा आयोगका अध्यक्ष कार्यालयमा फर्किए लगत्तै सचिव बढुवा सिफारिस समितिको बैठक बोलाउने बढुवा शाखाको तयारी छ । संघीय मामिला तथा सामान्य प्रशासन मन्त्रालयमा रहेको बढुवा शाखा अनुसार अहिलेसम्म शाखालाई प्रशासन सेवाका दुई सचिवको पद रिक्त भइसकेको जानकारी आएको छ ।

Advertisement 2

जसमा निर्वाचन आयोगका सचिव सुर्यप्रसाद गौतम र स्वास्थ्य तथा जनसंख्या मन्त्रालयका जनसंख्या तथा प्रशासन सचिव देवकुमारी गुरागाई अनिवार्य अवकाशमा गइसकेका छन् । निर्वाचन आयोगका सचिव गौतम अनिवार्य अवकाशमा गएको करिव एक महिना पुग्न लागिसकेको छ । उनी गत फागुन ६ गतेदेखि सचिवको पाँच वर्षे कार्यकाल पुरा गरेर अनिवार्य अवकाशमा गएका थिए ।

यस्तै स्वास्थ्य तथा जनसंख्या मन्त्रालयका जनसंख्या तथा प्रशासन सचिव गुरागाई फागुन २६ गतेदेखि सेवा अवधिका कारण अनिवार्य अवकाशमा गइसकेकी छन् । यो सँगै उपनिर्वाचनको तयारीमा जुटेको निर्वाचन आयोग करिव एक महिनादेखि सचिव विहिन भएको छ ।

आयोगका बरिष्ट सहसचिव यज्ञप्रसाद भट्टराईले निमित्त सचिवको जिम्मेवारी सम्हालीरहेका छन् । स्वास्थ्य तथा जनसंख्या मन्त्रालयमा भने स्वास्थ्य सेवाका सचिव डा।रोशन पोखरेलले नै जनसंख्या तथा प्रशासन सचिवको जिम्मेवारी सम्हालिरहेका छन् ।

यतिमात्रै नभएर कर्णाली प्रदेश सरकारको प्रमुख सचिव, सुदूरपश्चिम प्रदेश सरकारको प्रमुख सचिव र कोशी प्रदेशको प्रमुख सचिवको पद पनि लामो समयदेखि रिक्त रहेको छ । बढुवाको मुखैमा पुगेका बरिष्ट सहसचिव चुणामणी पौडेलले कायममुकायम सचिवको जिम्मेवारी सम्हाललिरहेका छन् भने सुदूरपश्चिम प्रदेश सरकारको कायममुकायम सचिवको जिम्मेवारी बरिष्ठ सहसचिव डा.हरी लम्सालले सम्हालिरहेका छन् ।

यस्तै बरिष्ठ सहसचिव केदारनाथ शर्माले कोशी प्रदेशको कायममुकायम प्रमुख सचिवको जिम्मेवारी सम्हालिरहेका छन् । बढुवा शाखा अनुसार सचिव बढुवाका लागि बरिष्ठ सहसचिव चुणामणी पौडेले पहिलो, डा.हरी लम्साल दोस्रो र केदारनाथ शर्मा तेस्रो नम्बरमा रहेका छन् ।

दुई जना सचिवको पद रिक्त भइसकेकाले सम्भव त पहिलो चरणमा पौडेल र लम्साल सचिवमा बढुवा हुनेछन् । अबको १० दिनपछि अर्थात चैत ११ गते श्रम, रोजगार तथा सामाजिक सुरक्षा मन्त्रालयका सचिव केवलप्रसाद भण्डारी सेवा अवधिका कारण अनिवार्य अवकाशमा जाने तयारीमाा छन् ।

भण्डारीको अवकाश भएपछि शर्मा पनि सचिवमा बढुवा हुनेछन् । तर, सचिव बढुवा सिफारिस समितिले बढुवाका लागि सिफारिस गरेका बरिष्ठ तीन जना सहसचिवमध्ये जो सुकैलाई पनि सचिव बढुवा गर्न सक्ने भएकाले को अगाडी र को पछाडी हुन्छ भन्ने एकिन छैन ।