विशेष अदालतबाट भ्रष्टचारी ठहर भएको फायल नै गायब पारेर पेन्सन खाने शिक्षक अख्तियार दुरुपयोग अनुसन्धान आयोगको फन्दामा परेका छन् ।
यसरी विशेष अदालतबाट भ्रष्टचारी किटान भएका प्रधानाध्यापक हुन योगेन्द्र प्रसाद यादव । नेपाल राष्ट्रिय प्राथमिक विद्यालयका पूर्व शिक्षकसमेत रहेका यादवविरुद्ध आयोगले दायर गरेको भ्रष्टाचार मुद्दामा अदालतले २०७३ वैशाख १६ मा कसुरदार ठहर गरिसकेको थियो ।

Advertisement 1

विशेष अदालतले विद्यालयको रकम हिनामिना गरेको आरोपमा १६ वैशाख २०७३ मा शिक्षक योगेन्द्रप्रसाद यादवलाई दोषी ठहर गरेको थियो । विशेष अदालतले उनलाई ४ महिना कैद र साढे ८८ हजार रुपैयाँ विगो र त्यति नै जरिवाना तोकेको थियो । मुद्दा चलेपछि म्याद गुजारेर बसेकाले उनले सर्वोच्च अदालतमा पुनरावेदन गर्न समेत पाएका थिएनन् ।

विशेष अदालतबाट दोषी ठहर भएपछि उनी स्वतः बर्खास्त हुन्थे । कर्मचारी सञ्चयकोषमा रहेको बचत बाहेक अरु कुनै पनि सुविधा पाउदैनथे । तर उनले सरोकारवाला निकायका कर्मचारीहरुको सहयोगमा आफू कसुरदार भएको फाइल गायब बनाए । यसरी भ्रष्टाचारको आरोपमा दोषी ठहर भएर बर्खास्तमा परेका शिक्षक यादवले अदालतले गरेको फैसलाको फायल नै गायब पारेर राजीनामा गरी निवृत्तिभरणसमेत लिएको पाइएको छ । अदालतको आदेशविपरित उनले १६ लाख ९२ हजार २६९ रुपैयाँ गैरकानुनी रूपमा भुक्तानी लिएर राज्यलाई नोक्सानी पुर्याएको आयोगको अनुसन्धानमा देखिएको छ ।

Advertisement 2

उनलाई अदालतको आदेश अनुसार बर्खास्त नगरी उल्टै निवृत्तभरण उपलब्ध गराउनका लागि विद्यालय निरीक्षकदेखि नेपाल राष्ट्रिय प्राथमिक विद्यालयका पूर्व प्रधानाध्यापकहरू,जिल्ला शिक्षा अधिकारीलगायतको मिलेमतो रहेको पाइएको छ ।