Advertisement 1

भारतीय नागरिक अनुप मेहराविरुद्ध भ्रष्टाचार मुद्दा दायर भएको छ । विशेष अदालत काठमाडौंमा विचाराधीन रहेको वादी नेपाल सरकार र प्रतिवादी टीकाराम ज्ञवालीसमेत रहेको गैर–नेपाली नागरिकलाई नक्कली जग्गाधनी खडा गरी जग्गा बिक्री वितरणबाट भ्रष्टाचार गरेको आरोपमा अख्तियार दुरुपयोग अनुसन्धान आयोगले उनीविरुद्ध आज मुद्दा दायर गरेको हो ।

आयोगका प्रवक्ता भोला दाहालका अनुसार मेहराले नेपाल सरकारको नाममा आउनुपर्ने जग्गा भूमिसुधार कार्यालय नवलपरासीका तत्कालिन भूमिसुधार अधिकारीसँगको मिलेमतोमा नक्कली कागजात तयार गरेर लामो समयदेखि हदबन्दी रोक्का रहेको जग्गा फुकुवा गर्ने निर्णय गराएका थिए ।

Advertisement 2

उक्त जग्गामध्ये २०५८ सालमा संशोधन भएको जग्गाको हदबन्दीबमोजिम नेपाल सरकारको नाममा छाड्नुपर्ने र व्यक्ति आफुले रोज्न पाउने जग्गा मात्र बेचबिखन गर्न पाउनेमा मेहरा नेपाली नागरिक नभई भारतीय भएको खुलेपछि अख्तियारले उनीविरुद्ध भ्रष्टाचार मुद्दा दायर गरेको छ ।

मेहराले आफ्नो नामबाट र सम्बन्धित हकवाला व्यक्ति नै फरक पारी नेपाल सरकारको नाममा आउनुपर्ने जग्गा सरकारी कर्मचारीको मिलेमतोमा बिक्रीवितरण गरेकाले अख्तियारले भ्रष्टाचार निवारण ऐन, २०५९ दफा ८ बमोजिम जग्गा बिक्री गर्ने कसुरमा उनीविरुद्ध पाँच करोड ५० लाख ४२ हजार बिगो मागदाबीसहित आज विशेष अदलतमा मुद्दा दायर गरेको हो ।

तत्कालीन प्रमुख मालपोत अधिकृत टीकाराम ज्ञवाली, भूमिसुधार अधिकारी ईश्वरप्रकाश कलवार, मालपोत अधिकृत मनोहरप्रसाद पन्थी, नासु बुद्धिसागर तिवारी, रमेशमान श्रेष्ठलगायतले उनलाई नेपाली नागरिक खडा गरेका थिए ।

नक्कली नेपाली नागरिक खडा गरी सरकारका नाममा आउनुपर्ने ३२ रोपनी जग्गा बेचबिखनमा संलग्न १३ जनाविरुद्ध अख्तियारले यसअघि विशेष अदालतमा मुद्दा दायर गरेको थियो ।