वागमती प्रदेशको पहिलो आर्थिक मामिला तथा योजना (अर्थ) मन्त्री बनेका रामेछापका कैलास ढुंगेल अहिले नेकपा एमाले वागमती प्रदेशको अध्यक्ष बनेका छन् । अर्थमन्त्री बनेर मनमाफिक योजनाहरु र रकम गृहजिल्लामा पारेर विकासका कामहरु गरेका भएपनि उनले आमचुनावमा विपक्षीसँग निकै हजारको अन्तरालमा हार व्यहोर्नुप¥यो । जनताले नपत्याएका ढुंगेललाई पार्टी संस्थापनका सबै नेताहरुको जोडबलमा अनेक हरकत गरी वागमतीको अध्यक्ष बनाइएपछि रामेछापकै एमालेहरुले भने यसलाई सहज रुपमा लिन नसकेको पाइयो । विद्यार्थी राजनीतिदेखि युवा संघमा समेत आबद्ध भई थुप्रै असजिला मोडहरुमा पार्टीका पक्षमा हातपाउ भाँच्चिउञ्जेल उभिएका रामेछाप एमाले जिल्ला कमिटी सदस्य शेरबहादुर तामाङले कैलासको जितलाई पार्टी सिध्याउने खेलोको रुपमा व्याख्या गरेका छन् । उनले कैलासले अध्यक्ष पदको शपथ लिनासाथ नै हार्दिक बधाई तथा शुभकामना भन्दै उनको प्रवृत्तिको भण्डाफोर गरेका छन् ।
कैलास लगायत रामेछापबाट वागमती प्रदेश कमिटीमा विजयी हुनेहरुको फोटो समेत राखी कैलासको जितबाट अब रामेछापमा पैसा दिएर स्थानीय निकायको चुनावमा पद खरिद गर्न सकिने भएको उल्लेख गरेका हुन् । खुल्यो खुल्यो खुल्यो भन्ने शीर्षकमा उनले कैलासको फोटो राखेर २०८४ को स्थानीय तहको निर्वाचनमा पैसा दिएर टिकट खरिद गर्ने अवसर खुलेको भनी लेखेका हुन् । आफू निकट रहेका पार्टीका सबै सदस्यलाई पक्षपात नगरी दिइने टिकटको मूल्य समेत तोकेर उनले गाउँपालिकाको अध्यक्षका लागि ६० लाख, नगरपालिकाको मेयरको लागि २ करोड, वडा अध्यक्षको २० लाख र वडा सदस्यको लागि १० लाखमा टिकट खुलेको उल्लेख गरेका छन् ।

Advertisement 1

उनले स्थानीय तहको गत निर्वाचनमा कैलासले रकम असुलेर थुप्रैलाई टिकट बाँडेको र फेरी उनै नेकपा एमाले वागमती प्रदेशको अध्यक्ष बनेपछि उल्लेखित रकममा टिकट बिक्री हुनसक्ने तर्फ व्यंगात्मक रुपले सचेत गराएका हुन् ।

Advertisement 2

फेसबुकमा कैलासलाई बधाई दिंदै उनले अगाडि लेखेका छन् इमान्दार र निष्ठावान् कार्यकर्तालाई भन्दा पैसा बेसी दिनेलाई प्राथमिकतामा राखी टिकट वितरण गरिने छ । रामेछापकै अर्का एमाले कार्यकर्ता पूर्ण क्षेत्री बरुवालले पनि आपुताली झैं सधैं टिकट पाइरहने तर अधिकांश समय हार मात्र व्यहोरेपनि ६६ वर्षे कैलासलाई आगामी दिनहरु सजिलो नभएको स्ट्याटस हालेका छन् । रामेछाप एमालेमा नेतृत्व विकास हुनै नदिने र माथिका नेताहरुको दैलोमा दिनहुँ धाएर मातहतका कार्यकर्ताको विरुद्धमा अनेक झोसपोल मात्र लगाइरहने कैलासको शैलीको विरोध गर्दै बरुवालले कमल चौलागाई, माधव ढुंगेल र गीता कार्की वैकल्पिक नेताका रुपमा रहेकाले अब उनलाई सजिलो नहुने उल्लेख गरेका छन् ।