कोशी प्रदेशको मुख्यमन्त्रीको कुर्सी नै अप्ठ्यारोमा परिरहेको समयमा पोखरामा सातै प्रदेशका मुख्यमन्त्रीहरुको भेला आयोजना गरिएको छ ।

Advertisement 1

कोशी प्रदेशका मुख्यमन्त्री हिक्मतकुमार कार्कीले आफूले विश्वासको मत नपाए प्रदेशसभा विघटन गर्ने चेतावनी दिएका छन् ।

कोशी प्रदेशका ९३ सदस्यीय सांसद छन्,जहाँ एमालेका ४० र राप्रपाको ६ सिट छ । २३ जेठमा कोशी प्रदेशबाट माओवादी केन्द्र सरकारबाट बाहिरिएपछि मुख्यमन्त्री हिक्मत कार्की अल्पमतमा छन् ।
माओवादी केन्द्रले सरकारलाई दिएको समर्थन फिर्ता लिएसँगै प्रधानमन्त्री प्रचण्डका ज्वाई तथा वन तथा वातावरण मन्त्री जीवन आचार्य,भौतिक पूर्वाधार मन्त्री दुर्गा चापागाईंले मुख्यमन्त्री हिक्मत कार्कीलाई राजीनामा बुझाइसकेका छन् । अल्पमतमा परेको २३ दिन अर्थात् पर्सी विश्वासको मत लिदैंछन् । बहुमतका लागि ४७ मत आवश्यक पर्छ । तर त्यहाँ विपक्षी र सत्ता पक्ष दुबैसँग ४६/४६ मत छ । विपक्षी कांग्रेससँग २९, माओवादी केन्द्रसँग सभामुख बाहेक १२, एकिकृत समाजवादीसँग ४ र जसपासँग १ सिट गरी ४६ सदस्य छन् । यस्तै एमालेसँग ४० र राप्रपा ६ गरी ४६ सिट छ । सत्तापक्ष र प्रतिपक्षसँग बराबर सिट संख्या भएकाले सरकार बनाउन निर्णायक भूमिकामा छन्,सभामुख बाबुराम गौतम । संविधानअनुसार पक्ष/विपक्षमा समान मत देखिए सभामुखले मतदान गर्न पाउँछन् । संविधानको धारा १६८को उपधारा ३ अन्तर्गत एमाले र राप्रपा बाहेकको गठबन्धनको सरकार बने मुख्यमन्त्रीलाई विश्वासको मत दिने बेलामा सभामुखले राजीनामा दिनु पर्ने तर्क जोडदार रुपमा उठ्न थालेको हो ।

Advertisement 2

यही घडीमा उता गण्डकी प्रदेशको राजधानी पोखरामा भने सातै प्रदेशका मुख्यमन्त्रीहरुको भेला शुरु भएको छ । प्रधानमन्त्री पुष्पकमल दहाल ‘प्रचण्ड’लेउद्घाटन गर्ने उक्त भेलामा  मुख्यमन्त्रीहरूबीच छलफल एवं अन्तरक्रिया हुने छ । भेलामा अन्तरप्रदेशबीचको अनुभव आदान–प्रदान, प्रदेशले संविधानतः पाउनुपर्ने अधिकारलगायत विषयमा छलफल हुने बताइएको छ ।

यसअघि मुख्यमन्त्रीको भेला गत जेठ १० गते गर्ने तय भए पनि प्रधानमन्त्री दाहालको व्यस्तताका कारण स्थगित भएको थियो । भेला दोस्रोपटक गर्न लागिएको हो । पहिलोपटक २०७५ भदौ २१ र २२ गते गण्डकीका तत्कालीन मुख्यमन्त्री पृथ्वीसुब्बा गुरुङको पहलमा भेला भई आठ बुँदे घोषणापत्रसमेत जारी गरिएको थियो ।