एउटा नेपाली उखानै छ ‘कहिँ नभएको जात्रा हाँडी गाउँमा ।’ त्यस्तै देखिएको छ सर्लाहीको हरिपुर्वा नगरपालिकामा । जहाँका प्रमुख प्रशासकीय अधिकृत शम्भुप्रसाद यादव हाजिर भएको एक घन्टामै सरुवामा परेका छन् । मधेस प्रदेश मुख्यमन्त्री तथा मन्त्रिपरिषद् कार्यालयका शाखा अधिकृत यादवलाई संघीय मामिला तथा सामान्य प्रशासन मन्त्रालयले गत शुक्रबार हरिपुर्वा नगरपालिकाको प्रमुख प्रशासकीय अधिकृतमा खटाएकोमा आइतबार बिहान ११ बजे पदभार ग्रहण र हाजिर गरेका थिए । तर, एक घन्टामै दिउँसो १२ बजे सामान्य प्रशासन मन्त्रालयले यादवलाई मुख्यमन्त्री कार्यालयमै यथावत् राख्न पत्र पठाएपछि उनी फर्किएका हुन् ।

Advertisement 1

हरिपूर्वा नगरपालिकामा प्रमुख प्रशासकीय अधिकृत टिक्न नसक्नु भने नौलो कुरा होइन । तत्कालीन प्रमुख प्रशासकीय अधिकृत वसन्त न्यौपानेलाई नगरपालिकाकै जनप्रतिनिधिले दुर्व्यवहार गरेपछि रिक्त पद अहिलेसम्म खाली नै छ । २०७९ चैत १५ गते न्यौपाने भएपछि मन्त्रालयले २२ चैतमा सञ्चार तथा सूचना प्रविधि मन्त्रालयका उपसचिव ध्रुवराज आचार्यलाई हरिपूर्वाको प्रमुख प्रशासकीय अधिकृतमा खटायो । आचार्य नगरपालिकामा हाजिर हुन नपुग्दै २९ चैतमै मन्त्रालयले फेरि यथावतकै कार्यालयमा खट्न निर्देशन दियो, उनी सर्लाही पुगेनन् । त्यसपछि पुगेका यादव एक घण्टामा सरुवा भएपछि नगरपालिकामा प्रमुख प्रशासकीय अधिकृत नै छैनन् ।

Advertisement 2