पद र शक्तिको आडमा सेनाको उच्च पदमा रहँदै आएका नेपाली सेनाका एक बहालवाला उपरथीलाई सैनिक मुख्यालयले नियन्त्रणमा लिएर हिरासतमा राखेको छ ।

Advertisement 1

सैनिक मुख्यालयले उपरथी प्रेम शाहीलाई सैनिक मुख्यालयबाटै नियन्त्रणमा लिएर सैनिक हिरासतमा राखेको हो । नेपाली सेनाको छाउनीस्थित अस्पतालमा कार्यरत रहँदा उपरथी शाहीमाथि आर्थिक अनियमितता गरेको अभियोगमा सैनिक मुख्यालयले छानबिन शुरू गरेको थियो ।

५७ वर्षे उमेरहदका कारण शाही बुधबार (पुस २०) बाट नियमित अवकाशमा जाँदै थिए । संगठनको परम्पराअनुसार १५ दिनअघि बिदा बस्ने परम्पराअनुसार उनले अवकाश पत्र पनि बुझिसकेका थिए । अवकाशपत्र लिएपछि उनले आफ्नो उमेर एक वर्ष बढी कायम गरिएको भन्दै सैनिक मुख्यालय र रक्षा मन्त्रालयविरुद्ध पुस ७ मा सर्वोच्च अदालतमा रिट दिएका थिए ।

Advertisement 2

सर्वोच्चले पुस १३ मा शाहीका पक्षमा अन्तरिम आदेश जारी गर्दै जंगीअड्डाको अवकाशमा पठाउने निर्णय कार्यान्वयन नगर्न आदेश दिएको थियो । सर्वोच्चको आदेशपछि मंगलबार नियमित कामका लागि जंगीअड्डा पुगेका बेला शाहीलाई सैनिक प्रहरीको टोलीले नियन्त्रणमा लिएको हो । सेनाको अनुशासनविपरीत काम र आर्थिक अनियमितता गरेको उजुरी परेपछि उनलाई नियन्त्रणमा लिएर अनुसन्धान थालिएको सैनिक मुख्यालयले जनाएको छ ।

सैनिक प्रवक्ता सहायक रथी कृष्णप्रसाद भण्डारीले सर्वोच्चको आदेश र उपरथी शाहीलाई हिरासतमा राखिएको घटना फरक–फरक रहेको बताए । शाहीलाई आर्थिक अनियमितता आरोपमा हिरासतमा राखिएको उनले दाबी गरे ।

‘उपरथी शाहीलाई अहिले सैनिक पहराभित्रै रहन भनेका हौँ । विभिन्न पदमा रहेका वेला भएका आर्थिक अनियमितताको सम्बन्धमा अनुसन्धान गर्नुपर्ने भएको हुँदा उहाँलाई पक्राउ गरिएको हो । सर्वोच्च अदालतको आदेशसँग यसको कुनै सम्बन्ध छैन,’ उनले भने ।

सेनामा उपरथीको अवकाश उमेरहद ५७ वर्ष छ । सैनिक जंगी अड्डाका अनुसार उनी २० पुसमा ५७ वर्ष पुग्छन् । तर, नागरिकता प्रमाणपत्रमा उनको जन्ममिति २२ पुस ०२३ उल्लेख छ । यसअनुसार उनी अहिले ५५ वर्ष ११ महिना २८ दिनको मात्रै भएको देखिन्छ । यसलाई आधार मान्दा उनको अवकाश लिने अवधि अझै एक वर्ष दुई दिन बाँकी भएको देखिन्छ ।