मन्त्रिपरिषद्को नियमित बैठक आज बस्न लागेको छ । संष्कृति पर्यटन तथा नागरिक उड्डयन मन्त्री जीवनराम श्रेष्ठका अनुसार प्रधानमन्त्री शेरबहादुर देउवाले आज १ बजे क्याविनेट बैठक डाक्नुभएको छ । आजको बैठकले आगामी मङ्सिर ४ गते प्रदेश र संघको निर्वाचनको मिति घोषणा गर्न सक्नेछ ।

Advertisement 1

यस्तै केही सचिवहरुको सरुवा तथा केही विशिष्ठ श्रेणीका सहसचिवहरुलाई सचिवको बढुवाको निर्णय गर्न सक्नेछ । आजको क्याविनेटले केही सचिवहरुको सरुवा गर्नसक्नेछ सिंहदरबार स्रोतले जनाएको छ । अर्थ सचिवमा डा बैकुण्ठ अर्याल र डा दामोदर रेग्मीमध्ये एक जनालाई लैजान सक्ने चर्चा छ । यस्तै हाल उद्योग सचिवका रुपमा कार्यरत अर्जुन प्रसाद पोखरेल पनि त्यता पुग्न सक्नेछन् । मुख्य सचिवका क्लासमेट मधु मरासिनी अर्थबाट प्रधानमन्त्री तथा मन्त्रिपरिषद् कार्यालयमा पु¥याएर अहिले लक्ष्मण अर्यालले सम्हालेको प्रशासन तथा नतिजा व्यवस्थापनको जिम्मेवारी दिइने तयारी चल्दैछ ।

अहिले चार जना निकाय सचिव बिहिन छन । प्रधानमन्त्री तथा मन्त्रिपरिषद् कार्यालयका सचिव लक्ष्मण अर्याल हिजो अनिवार्य अवकाशमा गइसकेका छन् । यस्तै पर्यटन सचिव महेश्वर न्यौपाने अनिवार्य अवकाश लागेर घर फर्किएका र उपराष्ट्रपति कार्यालयका सचिव रामकृष्ण सुवेदी शिक्षामा पुगेसँगै चार सचिव पद रिक्त छ ।यस्तै लेखा परीक्षणतर्फ एक पद रिक्त छ । त्यहाँ सहसचिव बिन्दु विष्ट सचिवमा बढुवा हुनेछिन् । सम्भवत आजैको क्याविनेटले उनलाई सचिवमा बढुवा गर्न सक्नेछ ।

Advertisement 2

यता अर्थमा जाने सचिव कोही तयार नहुँदा उता पर्यटन ताक्ने सचिवको चाहिँ संख्या आधा दर्जन भन्दा बढी छ । नाताले प्रमुख निर्वाचन आयुक्त दिनेश थपलियाका फुफुको छोरा तथा हाल सामान्य प्रशासनका सचिव सुरेश अधिकारी पर्यटन जान लबिङ तिव्र पारेका भए पनि अहिलेका सामान्इ प्रशासन मन्त्रीले उनलाई छोड्न मानेका छैनन् । जागिरे जीवनको लामो समय पर्यटनमै बिताएका सुरेश अचार्य प्रधानमन्त्री तथा मन्त्रिपरिषद् कार्यालयबाट त्यता जाने इच्छा जाहेर गरिरहेका छन् । प्रशासनका कर्मचारीको बोलबोला रहेको ठाउँमा अचार्यजस्ता प्राविधिक कर्मचारीले इच्छा जाहेर गरेर मात्र हुने कुरा होइन ।

वालुवाटारदेखि शक्तिकेन्द्रहरु दाहिने भएका मुकुन्द निरौला,सूर्य गौतम,रामेश्वर दंगालसमेत जीवनराम श्रेष्ठले सम्हालेको मन्त्रालयमा ताक्नेमा छन् । मुख्यसचिव रेग्मीले भेगीय हिसाबले काम गरे आफ्नै गृहजिल्लाबासी डिल्लीराम शर्मालाई पर्यटनमा पठाउन सक्ने आँकलन पनि हुन थालेको छ । महिना दिन अघि बढुवा भएका डा गोपी खनाल रौतहटजिल्ला बासी भएको नाता लगाउँदै कल्याणी खड्कामार्फत पर्यटनमा जान लबिङमा छन् ।

यता स्वास्थ्य तथा जनसंख्या मन्त्रालयमा कार्यरत सचिव देवकुमारी गुरागाईलाई प्रधानमन्त्री तथा मन्त्रिपरिषद्को कार्यालयमा पठाएर त्यहाँ पुग्नका लागि सूर्यप्रसाद गौतमदेखि रामप्रसाद घिमिरेहरुसम्मले जोडबल गरिरहेका छन् ।

आजको क्याविनेटले प्रशासनतर्फ रिक्त एक सचिव पदका बढुवाका लागि सिफारिसभएका सहसचिवत्रय डा दीपक काफ्ले, नारायण शर्मा दुवाडी र दिनेश घिमिरेमध्ये एक जनालाई सचिवमा बढुवा गर्न सक्नेछ ।