Advertisement 1

अख्तियार दुरुपयोग अनुसन्धान आयोगले यातायात व्यवस्था कार्यालयका तत्कालीन हाकिमसहित कर्मचारी र बिचौलियामाथि भ्रष्टाचार मुद्धा दायर गरेको छ ।
अख्तियारले आज गैरकानुनी नवीकरणको बाटो प्रयोग गरी ५३३ जना व्यक्तिलाई लाइसेन्स दिएको अभियोगमा यातायात व्यवस्था कार्यालयका तत्कालीन प्रमुखसहितका कर्मचारी र बिचौलिया समूहविरुद्ध विशेष अदालतमा भ्रष्टाचार मुद्धा दायर गरेको हो ।
आयोगले मुद्धा चलाएका कर्मचारीहरुमा सवारी चालक अनुमतिपत्र एकान्तकुनाका तत्कालीन कार्यालय प्रमुख सम्बरबहादुर कार्की र राजुभाई कुस्मा, मेकानिकल इन्जिनियर विजयराज गिरी, सहायक स्तर (पाचौँ) कमल स्याङतान, सिनियर मेकानिक्स अच्युतप्रसाद फुयाल, कम्प्युटर अपरेटर (करार सेवा) प्रकाश कार्की, कम्प्युटर अपरेटर (करार सेवा) रेजु भट्टराई, कम्प्युटर अपरेटर (करार सेवा) रोसन राजभण्डारी, कम्प्युटर अपरेटर (करार सेवा) श्यामसुन्दर चौधरी, कम्प्युटर अपरेटर (करार सेवा) लक्ष्मी श्रेष्ठ, कम्प्युटर अपरेटर (करार सेवा) माया सेठी, कम्प्युटर अपरेटर (करार सेवा) रिचा श्रेष्ठmलाई अभियुक्तको रुपमा विशेष अदालतमा मुद्धा दर्ता गराएको हो ।

आयोगले सवारी चालक अनुमति पत्र, एकान्तकुना, ललितपुरका कर्मचारीहरु तथा सिन्धुली फोटोकपी सेन्टरका सञ्चालक बाबुराम शर्मासमेतले सेटिङमा विचौलियामार्फत सवारी चालक अनुमति पत्र जारी गरिरहेको भन्ने उजुरी तथा निवेदन सम्बन्धमा अनुसन्धान गर्दा यातायात कार्यालयका हाकिमसहितका कर्मचारी,करार सेवाका कम्युटर अपरेटरका अलवा विचौलियाहरु हरिभक्त श्रेष्ठ, बाबुराम शर्मा भन्ने उद्धब बहादुर खत्री, दिपक विश्वकर्मा, गणेश अधिकारी र नरेन शाक्यसमेतको मिलेमतोमा विविध कारणले नवीकरण नभएका तथा स्वत रद्द भएका सवारी चालकको नाममा जारी भएको सवारी चालक अनुमति पत्र गैरकानूनी रुपमा नवीकरण गरिएको भेटिएको थियो ।
आयोगका अनुसार यसरी ५३३ जना नयाँ व्यक्तिको नाममा जारी गरेर सरकारी कागजात सच्याई भ्रष्टाचार निवारण ऐन, २०५९ को दफा ११ बमोजिमको कसुर गरेकोले यातायात कर्मचारी तथा विचौलियाहरुलाई मतियारका रुपमा भ्रष्टाचार मुद्दा चलाएको हो ।