अख्तियार दुरुपयोग अनुसन्धान आयोगले पूर्व नायब सुब्बा भीमकान्त भण्डारीमाथि अकुत सम्पत्ति आर्जनको अभियोगमा विशेष अदालतमा मुद्धा दायर गरेको छ । अस्ति तीन गते अख्तियारले भण्डारीमाथि ६ करोड २४ लाख ४ हजार अकुत आर्जनको अभियोगमा उनी उपर विशेष अदालतमा मुद्धा दायर गरेको हो ।

Advertisement 1

स्थानीय विकास प्रशिक्षण प्रतिष्ठान, कलवलगुडी, झापाका तत्कालीन बरिष्ठ व्यवस्थापन सहायकका रुपमा कार्यरत रहँदा भण्डारीले सार्वजनिक पदमा वहाल रहँदा पदको दुरुपयोग गरी ६ करोड २४ लाख ४ हजार अकुत वा गैरकानूनी सम्पत्ति आर्जन गरेको र सो को स्रोत देखाउन नसकेपछि उनीविरुद्ध अख्तियारले विशेष अदालतमा मुद्धा दायर गरेको अख्तियारद्धारा दायर गरिएको अभियोग पत्रमा उल्लेख गरिएको छ । ०७३ असोज २१ मा सरकारी सेवामा प्रवेश गरेका भण्डारी ७७ साउन १ मा मा स्वेच्छिक अवकाश रोजेका भण्डारीले कोरोना कहर शुरु भए पछि सरकारी जागिर छाडेर बिथ ल्याब नामक कोरोना किट परीक्षणको धन्दामा लागेका थिए ।

स्वास्थ्य सामाग्री खरिद प्रकरणमा ओम्नी नामक कम्पनी बदनामीमा मुछिए पछि भण्डारीले बिथ ल्याब जन्माएर उनी कोरोनाको किट परीक्षणमा लागेका थिए । मासिक २८ हजार हाराहारी तलब थाप्ने भण्डारीले एकाध बर्षमै अकुत आर्जन गरेपछि गुल्मीतिर उनलाई नजिकबाट चिन्ने र जान्नेहरु चकित भएका थिए ।

Advertisement 2

उनलाई नजिकबाट चिन्नेहरुका अनुसार कुनै समय काठमाडौंमा कोठाभाडा तिर्न नसकेर एक हजार सापटी माग्ने भण्डारी छोटो समयमै रातारात करोडपतिमा रुपान्तरित भएका थिए । गुल्मीको मालिका गाउँपालिका ५ का सामान्य परिवारमा जन्मेका भण्डारीको सम्पत्ति विवरण हेर्दा यति धेरै लगानी गर्ने आर्थिक हैसियत देखिँदैन । स्थानीय विकास मन्त्रालय स्रोतले उपलब्ध गराएको सम्पत्ति विवरण अनुसार २०७१ माघ २२ गतेसम्म भण्डारीले बुबाको नाममा १ रोपनी बारी, २ रोपनी खरबारी र ३ रोपनी खेत तथा हजुरबुबाको नाममा १४ रोपनी पुर्ख्यौली बारी रहेको विबरण बुझाएका छन् । सबै परिवारको जम्मा गर्दा उनको परिवारसँग २० रोपनी १२ आना जग्गा रहेको देखिन्छ ।

त्यस्तै पुर्ख्यौली सम्पत्तिकै रुपमा ३ तोला सुन, ५ तोला चाँदी र ३ लाख नगद रहेको विवरणमा उल्लेख रहेको मन्त्रालयबाट प्राप्त विवरणमा उल्खेख छ । त्यो बेलासम्म भिमकान्तको नाममा विभिन्न बैंक खातामा २ लाख ४५ हजार र विमलाको नाममा १७ हजार थप नगद भएको समेत देखिन्छ । त्यसका साथै ३६ हजारको डेस्कटप, ५६ हजारको ल्यापटप र ३ थान मोवाइलसेट समेत रहेको विवरण उनले बुझाएका छन् । नगद र जिन्सी हिसाव गर्दा २०७१ को माघ २२ गतेको मूल्य अनुसार बढीमा ५ लाख ४० हजार बराबर रहेको उनीहरुको आर्थिक हैसियत त्यस यताको ५ वर्षमा भने एकाएक करोडौंमा पुगेको थियो ।
भण्डारी जागिरे जीवनका क्रममा रहँदा तत्कालीन स्थानीय विकास मन्त्री हितराज पाण्डे ,महिला बालबालिका मन्त्री आशा कोइराला,अर्थमन्त्री कृष्णबहादुर महरा र उर्जामन्त्री बर्षमान पुनको सचिवालयमा बसेर काम गरेका थिए ।