अबदेखि अवकाश प्राप्त कर्मचारीहरुले आफ्नो निवृत्तिभरणका लागि भौतारिनु नपर्ने भएको छ । संघीय मामिला तथा सामान्य प्रशासन मन्त्रालय मातहतको निजामती किताबखानाले अबदेखि अवकाशप्राप्त कर्मचारीहरुको निवृत्तिभरणका लागि पेन्सन पट्टालगायतका कागजात तयार गर्न किताबखाना धाउनुपर्ने व्यवस्था अन्त्य गर्न लागेको हो । किताबखानाले इ पेन्सन प्रणाली कार्यान्वयन गर्नका लागि पूर्व अर्थसचिव कृष्णहरि बाष्कोटासहित विज्ञको टोली बनाएर काम गरिरहेको छ ।

Advertisement 1

यस अघि अवकाश प्राप्त कर्मचारीहरुले आफ्नो पेन्सनका लागि महिनौ दिन धाउनु पर्ने अबस्था थियो । किताबखानाले त्यस्तो झण्झट अन्त्य गर्न लागेको हो । अब त्यस्ता अवकाशप्राप्त कर्मचारीले अनलाइनबाट पेन्सन पट्टा बनाउन सक्ने भएका छन् ।किताबखानाले सबै निजामती कर्मचारीको व्यक्तिगत विवरणसहितको कर्मचारी सङ्केत नम्बर डिजिटलाइजेसन गरी ई–पेन्सन प्रणाली कार्यान्वयन गर्ने प्रक्रिया अघि बढाएको छ । यससँगै कर्मचारी अवकाश हुँदा किताबखानासम्म धाइरहनुपर्ने अवस्थाको अन्त्य हुने संघीय मामिला तथा सामान्य प्रशासन मन्त्रालयले जनाएको छ ।

निजामती किताबखानाका अनुसार अब कर्मचारी अवकाश हुने छ महिना पूर्व नै सम्बन्धित कर्मचारीलाई अनलाइनका माध्यमबाट जानकारी दिने, कर्मचारीले जुनजुन विवरण पठाउनुपर्ने हो सो विवरण अनलाइनकै माध्यबाट पठाउने, मासिक, पेन्सन स्केल पनि अनलाइनबाटै जानकारी दिने र कर्मचारीको सम्बन्धित कार्यालय, कोष तथा लेखा नियन्त्रण कार्यालय, निवृत्तभरण कार्यालय, पेन्सन लिने बैङ्कबारे अनलाइन माध्यमबाट जानकारी दिइनेछ ।

Advertisement 2

राष्ट्रिय किताबखाना (निजामती)का महानिर्देशक बाबुराज श्रेष्ठले ई–पेन्सन प्रणाली कार्यान्वयनका लागि अहिले विज्ञसहितको टोलीले अध्ययन गरी प्रतिवेदन तयार गर्न लागेको बताए ।

सबै तहका कर्मचारीको नियुक्तिपत्र, नागरिकता, शैक्षिक योग्यता, सरुवा, बढुवा, बिदा, जोडिएको सेवा अवधि, कर्मचारीले पाएको पुरस्कार र विभागीय कारबाहीलगायतका दस्तावेजलाई डिजिटलाइजेसन गरी ई–पेन्सन प्रणाली लागू गर्न लागिएको हो ।

सबै कर्मचारीको व्यक्तिगत विवरणको अभिलेख डिजिटलाइजेसन भएपछि विस्तृत विवरण कम्युटरमा निश्चित कोड नम्बर हानेपछि प्राप्त गर्न सकिन्छ । अबको एक वर्षमा ई–पेन्सन प्रणाली कार्यान्वयनमा आउने छ ।