खगेन्द्र सुनारमाथि उठेका प्रश्नबारे रास्वपाको छानबिन, औपचारिक कार्यक्रममा सहभागी नहुन निर्देशन
काठमाडौं। राष्ट्रिय स्वतन्त्र पार्टी (रास्वपा) ले प्रतिनिधिसभा सदस्य खगेन्द्र सुनारमाथि सञ्चारमाध्यममा सार्वजनिक भएका आरोपबारे आन्तरिक छानबिन अघि बढाएको छ। पार्टीले छानबिनको निष्कर्ष नआएसम्म उनलाई सार्वजनिक पदको हैसियतमा कुनै पनि औपचारिक कार्यक्रममा सहभागी नहुन निर्देशन दिएको छ।
Advertisement 1
पार्टीका महामन्त्री विपिन कुमार आचार्यले विज्ञप्ति जारी गर्दै सुनारसँग सम्बन्धित समाचार, सार्वजनिक श्रव्य सामग्री तथा उठेका गम्भीर प्रश्नहरूप्रति पार्टीको ध्यानाकर्षण भएको जनाएका छन्।
विज्ञप्तिमा महिलाको मर्यादा र सम्मानमा आँच पु¥याउने कार्य, अनुचित दबाब, अवाञ्छित धम्की तथा शंकास्पद आर्थिक लेनदेनसम्बन्धी विषय सार्वजनिक भएको उल्लेख छ। यी विषय आरोपका रूपमा सार्वजनिक भएकाले तिनको सत्यतथ्य निष्पक्ष अनुसन्धानबाट स्थापित हुनुपर्ने पार्टीको भनाइ छ।
Advertisement 2
रास्वपाले विषयको सत्यतथ्य पत्ता लगाउन केन्द्रीय अनुशासन आयोगलाई तत्काल आन्तरिक छानबिन प्रक्रिया अघि बढाउन निर्देशन दिएको जनाएको छ। अनुसन्धान प्रभावित नहोस् र पदीय नैतिकता कायम रहोस् भन्ने उद्देश्यले छानबिन टुंगो नलाग्दासम्म औपचारिक कार्यक्रममा सहभागी नहुन निर्देशन दिइएको विज्ञप्तिमा उल्लेख छ।
पार्टीले राज्यका सम्बन्धित निकायबाट स्वतन्त्र, निष्पक्ष र तथ्यपरक अनुसन्धान हुने विश्वास व्यक्त गर्दै त्यस्तो अनुसन्धानमा पूर्ण सहयोग गर्ने प्रतिबद्धता जनाएको छ।
Advertisement 3
महिलामाथि हुने दुव्र्यवहार, पदीय मर्यादाको उल्लङ्घन र फौजदारी कसुरका विषयमा पार्टीको शून्य सहनशीलताको नीति रहेको पनि विज्ञप्तिमा स्पष्ट पारिएको छ।
राज्यको अनुसन्धान र पार्टीको आन्तरिक छानबिनबाट प्राप्त निष्कर्षका आधारमा कानुन तथा पार्टी विधानबमोजिम थप कदम चालिने रास्वपाले जनाएको छ। कानुन उल्लङ्घन वा पदीय आचरणविपरीतको कार्य गर्ने व्यक्तिलाई राजनीतिक संरक्षण नदिने प्रतिबद्धता पनि पार्टीले व्यक्त गरेको छ।
सुनारमाथि सार्वजनिक भएका विषयलाई पार्टीको विज्ञप्तिमा उल्लेखित आरोपका रूपमा प्रस्तुत गरिएको हो। छानबिनको निष्कर्ष सार्वजनिक नभएसम्म आरोपलाई प्रमाणित तथ्यका रूपमा लिन मिल्दैन।
