काठमाडौं। सरकारले आम नागरिकलाई सामाजिक सुरक्षाको दायरामा ल्याउन शुरु गरेको सामाजिक सुरक्षा कोषमा झण्डै रु. १ खर्ब बराबरको योगदान रकम पुगेको छ।

Advertisement 1

कोषका अनुसार हालसम्म कूल योगदान रकम रु. ९५ अर्ब ४४ करोड १० लाख ५६ हजार ३ सय ६२ बराबर पुगेको छ। कोषमा हालसम्म सूचीकृत रोजगारदाता २२ हजार ३ सय ९ पुगेका छन्। यस्तै सूचीकृत योगदानकर्ता २६ लाख ४१ हजार १ सय ८९ बराबर पुगेको छ। कोषले हालसम्म रु. १७ अर्ब ६४ करोड ८८ लाख ३४ हजार ६ सय ८४ बराबरको रकम दाबी भुक्तानी गरेको छ।

कोषका अनुसार, औषधी उपचार, स्वास्थ्य तथा मातृत्व दाबी रकम रु. २ अर्ब ५१ करोड २० लाख ९४ हजार ८ सय २२, दुर्घटना तथा अशक्तता दाबी रु. २२ करोड ८६ लाख ५३ हजार ४ सय ७५ बराबर रहेको छ। त्यस्तै आश्रित परिवार सुरक्षा दाबी रकम रु. २९ करोड ७ लाख ७२ हजार १ सय १६ र अवकाश दाबी रकम रु. १४ अर्ब ६१ करोड ७३ लाख १४ हजार २ सय ७१ बराबर छ।

Advertisement 2

सरकारले पछिल्लो पटक वैदेशिक रोजगारीमा जाने श्रमिकलाई समेत कोषमा अनिवार्य रूपमा सहभागी हुनुपर्ने बाध्यकारी व्यवस्था गरेपछि कोषको प्रभावकारिता समेत बढेको छ। स्वरोजगार श्रमिक, उद्योग प्रतिष्ठान तथा विभिन्न सङ्घसंस्थाका कार्यरत कामदार तथा श्रमिक कोषमा सहभागी भइ योगदानकर्ता बन्न सक्छन्।

कोषमा नियमित रूपमा योगदान गर्नेले औषधोउपचार, पेन्सन तथा दुर्घटना अशक्तता सुरक्षा योजना, आश्रित परिवार सुरक्षा योजना, वृद्धावस्था सुरक्षा योजनाअन्तर्गत सुविधा पाउँछन्। कोषलाई प्रभावकारी बनाउन थप सिर्जनशल योजना ल्याउनुपर्ने आवाज पनि उठ्दै आएको छ। कोषमा योगदान रकम बढ्दै जाँदा लगानीका अन्य स्रोतहरूको खोजी गर्नुपर्ने आवश्यकता बढेर गएको छ।